Kanadíski áhrifavaldurinn Rebecca Luna, sem vakti mikla athygli á TikTok eftir að hún greindist með Alzheimer aðeins 48 ára gömul, er látin, 49 ára að aldri, eftir að hafa nýtt sér dánaraðstoð (MAID).

Luna, sem var einstæð móðir í Bresku Kólumbíu, greindi frá sjúkdómsgreiningu sinni í apríl 2025. Á næstu mánuðum deildi hún opinskátt reynslu sinni af sjúkdómnum, læknisheimsóknum og ákvörðun sinni um að nýta sér dánaraðstoð.

Hún varð jafnframt ötull talsmaður réttar fólks til að taka ákvarðanir um eigin lífslok og notaði samfélagsmiðla sína til að svara spurningum og veita öðrum í svipaðri stöðu upplýsingar og stuðning.

Saga hennar vakti athygli söngkonunnar Lily Allen eftir að Luna sagði að það væri á óskalista sínum að hitta hana. Þær hittust síðar á tónleikum Allen og lýsti Luna því sem einni bestu upplifun lífs síns.

Fáeinum dögum fyrir andlátið greindi Luna fylgjendum sínum frá því að hún hefði flýtt dagsetningu dánaraðstoðarinnar úr byrjun ágúst til 25. júlí. Hún sagði ákvörðunina snúast um að hafa stjórn á eigin lífi.

Í síðustu skilaboðum sínum sagði Luna að hún hefði lært að standa með yngri útgáfu af sjálfri sér og hvatti aðra til að elska sjálfa sig.

„Ef ég get þetta, þá getur þú það líka,“ sagði hún við fylgjendur sína.

Rebecca Luna lætur eftir sig stóran hóp fylgjenda sem hafa þakkað henni fyrir að varpa ljósi á Alzheimer-sjúkdóminn og umræðuna um lífslok. Hún var 49 ára og lætur eftir sig tvær fullorðnar dætur.