Atli Freyr Fjölnisson, sem hlaut fjögurra ára fangelsisdóm í stóru fíkniefnamáli árið 2015, er á meðal þeirra sem sitja í gæsluvarðhaldi vegna rannsóknar á smygli á 106 kílóum af kókaíni til landsins með súrálsskipi til Straumsvíkur.

Samkvæmt heimildum RÚV eru tveir brasilískir kafarar á meðal hinna níu sem eru í haldi vegna málsins. Talið er að þeir hafi gegnt lykilhlutverki við að sækja fíkniefnin úr svonefndri sjókistu skipsins Koznitza, þar sem þau voru falin undir sjávarmáli. Sérfræðingar segja slíka aðgerð hafa krafist sérhæfðs búnaðar og mikillar kunnáttu.

Í haldi eru þrír Íslendingar og sex erlendir ríkisborgarar, meðal annars frá Brasilíu og Rúmeníu. Hinir tveir Íslendingarnir eru Lárus Freyr Einarsson og Lúther Ólason.

Samkvæmt heimildum RÚV telur lögregla að Atli hafi verið milliliður milli þeirra sem tóku við hluta fíkniefnanna í iðnaðarhverfi í Kópavogi og þeirra sem afhentu efnin. Talið er að samskipti hafi farið fram í gegnum dulkóðaða samskiptaforritið Signal.

Lögregla rannsakar nú meðal annars símagögn, bankaupplýsingar og önnur sönnunargögn. Ekki er útilokað að fleiri verði handteknir í tengslum við rannsóknina.