Rödd unga fólksins, stjórnmálaflokkur í Grindavík, kærði fyrrverandi bæjarfulltrúa flokksins til lögreglu vegna gruns um fjárdrátt.

Í yfirlýsingu frá flokknum upplýsir flokkurinn um fjárdráttinn sem hafi verið í gangi innan flokksins á liðnu kjörtímabili. Sævar Þór Birgisson, þáverandi bæjarfulltrúi og gjaldkeri flokksins, dró að sér töluverða fjármuni eða sem nemur um 5.800.000 kr frá flokknum. Flokkurinn hafi ákveðið í fyrstu að kæra málið til lögreglu. Rannsókn málsins er nú lokið og var komist að þeirri ákvörðun að ljúka málinu með sátt um endurgreiðslu fjármunanna gegn því að kæran yrði dregin til baka.

Þar sem flokkurinn ákvað að bjóða ekki fram í sveitarstjórnarkosningum í ár ákvað stjórn flokksins að verja þessum fjármunum til að láta gott af sér leiða og gefa til baka til samfélagsins og uppbyggingu þess.

Í yfirlýsingunni segjast þau jafnframt „vilja stuðla að uppbyggingu í þágu barna, ungs fólks og barnafjölskyldna í Grindavík. Við höfum því ákveðið að gefa 5.800.000 kr. til kaups á nýjum leiktækjum á skólalóð grunnskólans við Ásabraut, en fyrirhuguð er enduruppbygging á lóðinni í tengslum við komandi skólastarf. Við erum stolt af þessari ákvörðun og vitum að þessir fjármunir munu nýtast börnum og fjölskyldum þeirra í Grindavík í mörg ár.“