Fallegt og sjarmerandi einbýlishús í klassískum stíl er nú komið á sölu í miðbæ Reykjavíkur á 170 milljónir króna.

Um er að ræða fasteign sem upphaflega var reist árið 1894 við Lindargötu en var flutt á Bakkastíg árið 1991 þar sem húsið var endurgert að nær öllu leyti.

Húsið stendur á rólegum stað í miðborginni og er á þremur hæðum með nýtanlegu risi sem er þó óskráð. Þá fylgja eigninni sérbílastæði á lóð með aðkomu frá Bakkastíg, sem telst sjaldgæft í þessum hluta borgarinnar.

Við inngang hússins er geymsla undir stiga og aðkoma að eigninni er snyrtileg með kantsteini og bílastæði. Útisvæði er staðsett inn af bílastæðinu með útgengi úr eldhúsi og borðstofu. Garðurinn er afgirtur með grasflöt og trjágróðri sem skapar skjólgóða og notalega stemningu.

Í fasteignaauglýsingu er húsið sagt sameina klassískan stíl og hlýlegt andrúmsloft. Eignin ber með sér mikinn sjarma og sögu og hentar vel þeim sem vilja búa í miðborg Reykjavíkur í húsi með karakter og sérstöðu.