Eldur Smári Kristinsson hefur ákveðið að áfrýja dómi Héraðsdóms Reykjavíkur sem féll í byrjun nóvember en Eldur greinir frá þessu í tilkynningu til fjölmiðla.

Eldur hafði þá kært RÚV og Bergstein Sigurðsson fréttamann fyrir ummæli sem Bergsteinn lét falla um Eld í sjónvarpsþætti á RÚV í fyrra en Eldur var frambjóðandi Lýðræðisflokksins sem bauð fram í Alþingiskosningum í fyrra og var oddviti flokksins í Norðausturkjördæmi.

Í þættinum ræddi Bergsteinn við Arnar Þór Jónsson, formann Lýðræðisflokksins, um Eld.

„Tölum einmitt um þjóna og þá sem þið veljið til þjónustu. Oddviti flokksins í Norðausturkjördæmi, Eldur Smári Kristinsson, hann er formaður Samtakanna 22, samtaka sem hafa verið sökuð um að ala á andúð í garð trans fólks, hefur verið fjarlægður af lögreglu úr grunnskóla fyrir að mæta þar í leyfisleysi, og mynda starfsfólk og börn, hann hefur sakað þau sem berjast fyrir réttindum trans fólks um barnaníð, þar á meðal nafngreinda íslenska baráttukonu, hann hefur líka þrástagast um að hún sé karl, farið mjög klúrum og ruddalegum orðum um kynfæri hennar á opinberum vettvangi…“

Við þessi orð var Eldur ekki sáttur og kærði í framhaldinu. Héraðsdómur komst hins vegar að þeirri niðurstöðu að rétt væri að sýkna RÚV og Bergstein og er Eldi Smára gert að greiða tæpa milljón í málskostnað.

„Ég þakka öllum þeim sem hafa stutt mig í þessu ferli og mun halda áfram að berjast fyrir gildum sem ég trúi á, þar á meðal frelsi til orðs og athafna,“ segir Eldur meðal annars í tilkynningu sinni.