Tollayfirvöld í Tyrklandi lögðu hald á tæplega 382 þúsund evrur í reiðufé, jafnvirði um 55 milljóna króna, sem fundust faldar í bleyjum í farangri farþega sem kom til landsins frá Frakklandi.
Atvikið átti sér stað á flugvellinum í Antalya þegar tollverðir skoðuðu handfarangur farþega sem hafði flogið frá París. Samkvæmt tilkynningu frá tyrkneska viðskiptaráðuneytinu fundust samtals 381.750 evrur í reiðufé, vandlega pakkaðar inn í að minnsta kosti sex bleyjur sem voru geymdar í lítilli ferðatösku.
Yfirvöld hafa ekki upplýst um þjóðerni farþegans né hvort um karl eða konu var að ræða. Saksóknari í Antalya hefur hafið rannsókn á málinu.
Þótt engin takmörk séu á því hversu mikið reiðufé einstaklingar mega flytja með sér inn í Tyrkland ber þeim samkvæmt lögum að tilkynna það til tollyfirvalda ef fjárhæðin nemur 10 þúsund evrum eða meira. Í þessu tilviki var um að ræða rúmlega 38 sinnum hærri upphæð en tilkynningarskyldan kveður á um.
Myndir sem tyrkneskir fjölmiðlar birtu sýna búnt af evruseðlum falin inni í bleyjunum, sem virtust hafa verið notaðar sérstaklega til að dylja fjármunina fyrir eftirlitsaðilum.
