Fimm smágrísir drápust og aflífa þurfti gyltu eftir að brotist var inn í svínabú Stjörnugríss í Saltvík í nótt og dýrum sleppt úr stíum. Fjölmörg önnur dýr særðust og hlutu áverka. Lögregla var kölluð á vettvang í morgun og er málið til rannsóknar.
Vísir greinir frá málinu.
Hjördís Sigurbjartsdóttir aðstoðaryfirlögregluþjónn staðfestir að verksummerki séu með svipuðum hætti og þegar brotist var inn hjá fyrirtækinu í maí síðastliðnum og svínum sleppt.
Í tilkynningu frá Stjörnugrís segir að rúða hafi verið brotin og farið inn um hana. Innréttingar hafi verið rifnar upp, stíur opnaðar og hurðir skildar eftir opnar. Dýrin gengu því laus um húsin og komust sum þeirra út á tún.
Geir Gunnar Geirsson, forstjóri Stjörnugríss, segir að tekist hafi að ná tökum á ástandinu og öll svín hafi verið rekin aftur inn.
Afleiðingar innbrotsins séu þó alvarlegar. Auk dýranna sem drápust hafi smitvarnir búsins verið rofnar þar sem dýr úr mismunandi hópum blönduðust saman. Fyrirtækið telur einnig hættu á frekari afleiðingum vegna streitu, meðal annars minnkaðri mjólkurframleiðslu og mögulegum fósturlátum.
„Okkur er mjög brugðið yfir því að þetta skuli hafa endurtekið sig,“ segir Geir og telur að aðgerðirnar virðist ekki snúast um velferð dýra.
Á undanförnum mánuðum hefur einnig verið brotist inn í Reykjabú og Dalsbú og dýrum sleppt. Geir hvetur þá sem kunna að búa yfir upplýsingum um málið til að hafa samband við lögreglu.
