Lögregla hafði í nógu að snúast á höfuðborgarsvæðinu í nótt og í gærkvöldi og komu fjölmörg mál til kasta hennar, þar á meðal fíkniefnabrot, hótanir, þjófnaður og umferðarlagabrot.

Þrír einstaklingar voru handteknir í Reykjavík fyrir brot á lögreglusamþykkt. Þá var ökumaður kærður fyrir hraðakstur í miðborg Reykjavíkur eftir að hafa mælst á 99 kílómetra hraða þar sem hámarkshraði er 60 kílómetrar á klukkustund. Annar ökumaður var kærður fyrir að aka gegn einstefnu í miðborginni

Á Álftanesi voru forsvarsmenn kærðir fyrir rekstur leyfislauss veislusalar.

Lögregla handtók ökumann í Garðabæ grunaðan um akstur undir áhrifum fíkniefna. Viðkomandi er einnig grunaður um sölu og dreifingu fíkniefna auk peningaþvættis.

Tilkynnt var um umferðarslys í Hafnarfirði. Samkvæmt upplýsingum lögreglu urðu aðeins minniháttar skemmdir á ökutæki og engin slys á fólki.

Í Kópavogi var einstaklingur kærður fyrir þjófnað úr raftækjaverslun. Þá var maður handtekinn í Breiðholti vegna gruns um hnífaburð og hótanir.

Einnig var einstaklingur handtekinn í Mosfellsbæ vegna eignaspjalla, hótana og fyrir að hafa ekki hlýtt fyrirmælum lögreglu.

Loks var ökumaður handtekinn í Árbæ, grunaður um ölvunarakstur.