Héraðsdómur Reykjaness hefur dæmt Lárus Siggeirsson í 60 daga skilorðsbundið fangelsi fyrir fíkniefna-, vopna- og umferðarlagabrot.
Lárus játaði sök fyrir dómi. Refsingin var ákveðin 60 daga fangelsi en fullnustu hennar frestað í tvö ár. Jafnframt var honum gert að greiða 100 þúsund króna sekt til ríkissjóðs og sæta sex mánaða sviptingu ökuréttar.
Samkvæmt ákæru fann lögregla umtalsvert magn fíkniefna og vopna við húsleit á heimili Lárusar, í mars árið 2024. Þar fundust 171,63 grömm af maríhúana auk fjölda lyfja og fíkniefna, þar á meðal 13 töflur af Alprazolam Krka, 40 töflur af Alprazolam Mylan, 60 töflur af Diazepam, 126 töflur af ýmsum læknislyfjum, 89 töflur af Rivotril, 52 töflur af Lexotan, 10 töflur af Metadon Abcur og þrjár Suboxone-töflur.
Við leitina lagði lögregla einnig hald á fjaðurhníf með áföstu hnúajárni, fallhníf, raflostbyssu, tvo piparúðabrúsa og útdraganlega kylfu.
Auk þessa var Lárus sakfelldur fyrir akstur undir áhrifum ávana- og fíkniefna og slævandi lyfja í apríl 2024. Lögregla stöðvaði akstur hans á Reykjanesbraut við Álfabakka í Reykjavík. Í blóðsýni mældust meðal annars díazepam, nordíazepam, oxýkódon og temazepam.
Í september sama ár fór lögregla aftur í húsleit á heimili hans. Þá fundust og voru haldlögð tvö stunguvopn, fjaðrahnífur, hnúajárn, skotfæri, piparúði og rafmagnsvopn.
Dómurinn kveður á um upptöku allra fíkniefna og vopna sem fundust við leitir lögreglu. Þar á meðal eru maríhúana, öll framangreind lyf, fjaðurhnífur með áföstu hnúajárni, fallhnífur, raflostbyssa, þrír piparúðabrúsar, útdraganleg kylfa, tvö stunguvopn, fjaðrahnífur, hnúajárn, skotfæri og rafmagnsvopn.
Lárus var jafnframt dæmdur til að greiða alls 467.589 krónur í sakarkostnað, þar af 247.380 krónur í þóknun verjanda síns.
