Jóhann Páll Jóhannsson, umhverfis-, orku- og loftslagsráðherra, hefur staðfest að heimilt verði að veiða helsingja frá 1. til 20. september á þessu ári. Veiðitímabilið verður því fimm dögum lengra en í fyrra en þetta kemur fram í tilkynningu frá stjórnvöldum.
Austur-Grænlandsstofn helsingja hefur rýrnað mikið undanfarin ár. Ísland og Bretland sömdu árið 2025 um að halda veiðum úr stofninum í lágmarki vegna stöðu hans og alþjóðlegra skuldbindinga Íslands.
Áhersla hefur jafnframt verið lögð á að veiðar beinist að þeim hluta stofnsins sem verpir hér á landi. Með því er meðal annars leitast við að draga úr tjóni bænda vegna ágangs fuglanna á ræktarland.
Varpárangur íslenska stofnsins hefur verið góður undanfarin ár og þróun hans jákvæð. Ráðherra féllst því á tillögu Náttúruverndarstofnunar um lengingu veiðitímans.
Áfram verður þó í gildi bann við sölu á helsingja.
Helsingi fellur undir AEWA-samninginn, en Ísland ber ásamt Grænlandi, Írlandi og Bretlandi ábyrgð á vernd Austur-Grænlandsstofnsins.
