Ný þáttaröð dönsku gamanþáttanna Klovn hefur hlotið afar jákvæðar viðtökur gagnrýnenda. Þeir hrósa sérstaklega Frank Hvam og Casper Christensen fyrir að halda áfram að fá áhorfendur til að skammast sín fyrir hönd persónanna og hlæja upphátt, jafnvel eftir 21 ár með þáttaseríuna.

Bæði Berlingske, Børsen og kvikmyndatímaritið Ekko gefa nýju þáttaröðinni fimm stjörnur.

Gagnrýnandi Børsen segir að gamanþættirnir, sem hafa verið sýndir í rúm 20 ár, hafi engu tapað.

„Maður getur ekki annað en dáðst að því hve óþrjótandi birgðir Frank og Casper virðast eiga af fyndnum þáttahugmyndum.“

Persónurnar eldast með áhorfendum

Að mati gagnrýnanda Berlingske eru Frank og Casper orðnir einstaklega lagnir í að leika ýktar útgáfur af sjálfum sér.

„Raunar finnst mér að það hvernig þættirnir fjalla um líkamlega og andlega viðkvæmni sem fylgir aldrinum hafi gefið seríunni nýtt líf,“ skrifar gagnrýnandinn.

Sami tónn er hjá Børsen, þar sem bent er á að styrkleiki Klovn felist í því að persónurnar hafi þróast með tímanum.

„Snilld Klovn er sú að Frank og Casper halda ekki í það hverjir þeir voru sem 35 ára menn árið 2005, heldur sýna hverjir þeir eru árið 2026.“

Gagnrýnandinn bendir á að vandamál fráskilins manns á fimmtugsaldri séu allt önnur en vandamál yngri, kvænts manns á uppleið.

Vinátta karla í gegnum æviskeiðin

Kvikmyndatímaritið Ekko tekur í sama streng og segir að persónurnar glími nú við öldrun, minnkandi kynþokka og mótleikara sem reyni verulega á þær.

Í umsögninni segir jafnframt að ein af afleiðingum þess að þættirnir hafi verið sýndir svo lengi sé að þeir hafi þróast í eins konar kortlagningu á vináttu karla á mismunandi skeiðum lífsins.

Í lok umsagnar sinnar bendir Berlingske þó á að sumum áhorfendum kunni að þykja erfitt að horfa á þættina þar sem þeir „leiki sér á ystu mörkum“.

„En þá tilheyra þeir einfaldlega öðrum og íhaldssamari húmorsskóla en meirihluti Dana.