Hreyfihamlaður farþegi varð eftir á César Manrique-flugvellinum á Lanzarote og missti af flugi sínu til Bristol í Bretlandi eftir að séraðstoð, sem hafði verið pöntuð fyrir ferðina, skilaði sér ekki. Atvikið átti sér stað 12. maí í flugstöð 1 á Ryanair-flugi til Bretlands en greint er frá málinu í spænsku fjölmiðlum.
Samkvæmt frásögnum vitna hafði farþeginn bókað aðstoð fyrir einstaklinga með skerta hreyfigetu og beið á tilteknum samkomustað þar sem starfsfólk átti að fylgja henni að brottfararhliði og um borð í vélina. Aðstoðin kom hins vegar aldrei og flugvélin fór af stað án hennar.
Þjónusta við farþega með skerta hreyfigetu á flugvellinum er í höndum fyrirtækisins Mitie, sem starfar sem undirverktaki fyrir flugvallarekandann Aena.
Vegna mistakanna þurfti farþeginn að dvelja eina nótt til viðbótar á Lanzarote og kaupa nýjan flugmiða með Ryanair daginn eftir. Atvikið hafði því í för með sér bæði aukinn kostnað og veruleg óþægindi fyrir viðkomandi.
Heimildir sem þekkja til starfsemi flugvallarins hafa bent á að mikill fjöldi beiðna um séraðstoð geti hafa átt þátt í atvikinu. Starfsfólk glími að sögn við aukið álag vegna vaxandi eftirspurnar eftir þjónustunni og skorts á mannskap.
Þetta er ekki í fyrsta sinn sem slíkt atvik kemur upp. Fyrir um ári síðan voru tveir aldraðir farþegar með skerta hreyfigetu sagðir hafa orðið eftir þegar þeir voru á leið um borð í easyJet-flug til Liverpool.
Aena hefur staðfest að rannsókn sé hafin á málinu. Í yfirlýsingu segir fyrirtækið að gripið verði til viðeigandi ráðstafana í samræmi við gildandi samninga og þær þjónustukröfur sem gerðar eru til fyrirtækisins sem annast aðstoðina.
