Leikfangahljóðfæri frá Wodi eru innkölluð vegna hættu á að þau geti festst í hálsi barns og valdið lokun öndunarvegar en þetta kemur fram í tilkynningu frá Húsnæðis- og mannvirkjastofnun.

Leikföngin eru viðarhljóðfæri sem seld eru sex saman í setti. Fjórir hlutir í settinu stóðust ekki prófanir samkvæmt leikfangastaðlinum þar af leiðandi eru vörurnar innkallaðar.

Engin slys hafa verið tilkynnt, en varan er metin geta valdið alvarlegri hættu fyrir ung börn. Því er mikilvægt að taka leikföngin úr umferð sem fyrst.

Talið er að leikfangið sé í umferð á Íslandi og eru eigendur þess beðnir um að hætta notkun þess tafarlaust og farga því. Ekki er vitað hvort leikfangið hafi verið selt í verslunum hérlendis, en það var selt í gegnum netverslunina Shein.