Glæsilegt einbýlishús við Mýrarbraut 5 í Vík í Mýrdal er komið á sölu. Um er að ræða 190,7 fermetra eign sem reist var árið 2011 úr forsteyptum einingum og stendur á vel frágenginni lóð með grónum garði og grindverki.

Íbúðarhluti hússins er 154,4 fermetrar að stærð en bílskúrinn 36,3 fermetrar. Ásett verð eignarinnar er 110 milljónir króna.

Húsið skiptist í anddyri með flísum á gólfi, hol, eldhús með innréttingu og flísalögðu gólfi, borðstofu og stofu með parketi. Stofurými hefur verið breytt með léttum vegg og skipt í tvö herbergi, sem gefur aukna nýtingarmöguleika.

Einnig eru í húsinu þrjú svefnherbergi með parketi á gólfum, gangur, baðherbergi með flísum á veggjum og gólfi, hornbaðkari, sturtu og innréttingu, auk þvottahúss með epoxy-gólfi og innréttingu.

Sérstakur kostur við eignina er að í bílskúrnum hefur verið innréttuð stúdíóíbúð sem getur nýst sem aukaíbúð, gestaaðstaða eða til útleigu.

Lóðin hefur verið frágengin með hellulögðum gangstéttum og bifreiðastæði. Umhverfis lóðina er grindverk sem skapar skjól og eykur næði.

Eignin hentar vel fyrir fjölskyldur sem leita að rúmgóðu heimili í Vík, þar sem stutt er í alla helstu þjónustu og náttúruperlur Suðurlands.