Inga Sæland, mennta- og barnamálaráðherra, hefur skipað Lindu Heiðarsdóttur og Ragnhildi Bolladóttur í tvö embætti skrifstofustjóra í mennta- og barnamálaráðuneytinu til næstu fimm ára.

Linda tekur við stöðu skrifstofustjóra á skrifstofu skóla- og íþróttamála. Hún er með B.Ed gráðu frá Kennaraháskóla Íslands og er að ljúka meistaraprófi í verkefnastjórnun við Háskóla Íslands. Hún hefur starfað sem aðstoðarskólastjóri í Réttarholtsskóla frá 2015 og gegndi tímabundið starfi skólastjóra. Auk þess hefur hún verið hópstjóri hjá Miðstöð menntunar og skólaþjónustu og stundakennari við Háskóla Íslands.

Ragnhildur verður skrifstofustjóri á skrifstofu framhaldsskóla og framhaldsfræðslu. Hún er með BA og diplómu í uppeldis- og menntunarfræði og stundar nám í opinberri stjórnsýslu. Hún hefur starfað sem teymisstjóri í ráðuneytinu og áður gegnt stjórnunar- og sérfræðistörfum hjá ýmsum stofnunum, þar á meðal Menntamálastofnun og Reykjavíkurborg.