Matthías Davíð Matthíasson, annar bræðranna í VÆB, sem í kvöld tekur þátt í fyrri undanúrslitum Eurovision í Sviss, er langveikur og var á tímabili vart hugað líf.

Foreldrar VÆB-bræðranna, Áslaug Helga Hálfdánardóttir og Mattías V. Baldursson viðtali í þætti Felix Bergssonar Fram og til baka þar sem þau ræddu meðal annars um eigin tónlistarferil og veikindi Matthíasar yngri en til 18 ára aldurs var hann með næringu í æð.

Matthías hefur sem sagt glímt við alvarleg veikindi í mörg ár og tók langan tíma að greina sjúkdóminn hans og finna viðeigandi meðferð. „Það hefur tekið á í gegnum tíðina,“ segir Áslaug í þættinum. „Við fengum ekki svör hvað væri að honum fyrr en hann var átján ára og svo fékk hann lausn í september. Þetta er genastökkbreyting sem enginn þekkti fyrr en hann varð átján ára. Hann þurfti að fá næringu í æð í gegnum lyfjabrunn og var háður því að vera tengdur við dæluna.“

Lífshættulegt ástand í upphafi

Matthías lýsir veikindum sínum þannig að hann hafi ekki getað melt fæðu. Hann hafi þó aldrei kvartað yfir því. „Hann þekkti ekkert annað og hann elst upp í systkinahópi og það var enginn að gefa honum neitt breik. Hann var ekki að fá vorkunn út á það að vera veikur.“

Strax eftir fæðingu þurftu foreldrarnir að dvelja löngum stundum á sjúkrahúsi með Matthías. „Eftir tvær vikur kom í ljós að hann væri ekki að nærast og hann var bara nærri dauða en lífi, það munaði bara sólarhring, það voru svo brenglaðar blóðprufurnar.“

Það liðu þrír mánuðir þar til þau gátu loks tekið barnið heim. Tvíburarnir Hálfdán og Hjördís tóku því með undrun. „Það sem Hálfdán segir þegar við komum heim sagði hann: Er þessi kominn aftur?“ segir Áslaug hlæjandi.