Tónlistarmaðurinn Auðunn Lúthersson er að selja íbúð sína að Leifsgötu 10.

Í myndbandi sem tónlistarmaðurinn setti á samfélagsmiðla vekur hann athygli á því að teknar hafi verið myndir af íbúð hans og gervigreind notuð til að breyta myndunum með því að bæta inn húsgögnum og öðru inn á myndirnar.

„Ég er að selja íbúð mína að Leifsgötu 10 og það er búið að taka þessar fallegu myndir af íbúðinni, nema hvað það er alveg pínu „scam“. Það er lenskan núna í fasteignasölu að maður taki bara fallegar ljósmyndir af íbúðinni tómri, svo er notuð gervigreind til að teikna inn húsgögn og ég skil það alveg smá. Það gefur aðeins skýrari hvernig það væri að búa í íbúðinni en maður sjái bara einhver tóm herbergi en ég veit það ekki. Þetta er alveg pínu forvitnileg þróun,“ segir tónlistarmaðurinn.

Hann spyr svo fylgjendur sína í kjölfarið hvort þeim finnist þetta vera svindl eða í góðu lagi.

Mannlíf fjallaði í fyrra um þessa þróun en í báðum tilvikum er að ræða um fasteignasöluna Pálsson.

Telja sumir notkun á gervigreindarmyndum brjóta gegn siðareglum fasteignasala og ræddi Mannlíf meðal annars við Grétar Jónasson, framkvæmdastjóra Félags fasteignasala, sem sagði að notkun á gervigreindarmyndum þarfnist ítarlegrar umræðu bæði í samhengi gagnvart lögum og siðareglum enda bjóði tæknin upp á ótrúlega hluti.

Þá átti að taka gervigreindarmyndir fyrir á stjórnarfundi félagsins en Grétar svaraði ekki fyrirspurnum um málið þegar Mannlíf hafði samband við hann eftir fundinn.

Brynhildur Pétursdóttir, framkvæmdastjóri Neytendasamtakanna, hefur sagt að það sé mat samtakanna að það verði að taka fram þegar um gervigreindarmyndir sé að ræða og er það gert í tilviki Auðuns en hefur ekki alltaf verið gert.