Óvenjulegt atvik náðist á öryggismyndavélar í þvottahúsi í Winston-Salem í Norður-Karólínu í Bandaríkjunum á þriðjudag þegar dádýr braust þar inn með látum.

Atvikið varð í Wishy Washy-þvottahúsinu. Á myndskeiði úr öryggismyndavélum staðarins sést dádýrið hlaupa á konu sem var að yfirgefa þvottahúsið áður en það braust í gegnum glugga og inn í húsnæðið.

Dádýrið virtist í miklu uppnámi og hljóp um þvottahúsið áður en það stökk upp á þvottavélar og þurrkara. Að lokum tókst því að finna leið aftur út um gluggann sem það hafði brotið við komuna.

Corey Pendergrass, eigandi þvottahússins, sagði í samtali við sjónvarpsstöðina WXII-TV að afar ólíklegt væri að verða vitni að atviki af þessu tagi.

„Það eru svona einn á móti milljón líkur á að eitthvað þessu líkt gerist,“ sagði Pendergrass og bætti við að enginn ætti von á því að dádýr ryddist með þessum hætti inn í fyrirtæki.

Þrátt fyrir hamaganginn slasaðist enginn. Að sögn Pendergrass varð heldur ekki mikið eignatjón fyrir utan rúðuna sem dádýrið braut. Viðgerðarfyrirtæki kom á staðinn síðar sama dag og gerði við skemmdirnar.

Myndskeið af uppákomunni var síðar birt á Facebook-síðu Wishy Washy Laundry og sýnir þar hið óvenjulega ferðalag dádýrsins í gegnum þvottahúsið.