Óeirðalögregla var kölluð út að stjórnlagadómstól Póllands í Varsjá í gærkvöld vegna harðnandi deilna um skipan dómara. Lögregla kom í veg fyrir að mótmælendur kæmust inn í bygginguna og voru þrír handteknir.

Mikil togstreita hefur verið milli ríkisstjórnar Donalds Tusk forsætisráðherra og hægri og íhaldsflokksins Laga og réttlætis, PiS, vegna dómskerfis landsins. Mótmælendur hliðhollir PiS hafa mótmælt ákvörðun Tusks um að reka Bogdan Swieczkowski, forseta stjórnlagadómstólsins.

Dómsmálaráðherra Póllands vill jafnframt að Swieczkowski og varaforseti réttarins verði sviptir friðhelgi svo hægt verði að sækja þá til saka.

Karol Nawrocki Póllandsforseti sneri flugvél sinni við á leið til Senegal vegna ástandsins og hélt aftur til Varsjár.

Deilurnar eiga sér langan aðdraganda. Þegar PiS var við völd á árunum 2015 til 2023 skipaði flokkurinn dómara við réttinn. Tusk hefur reynt að vinda ofan af breytingunum en mætt harðri mótspyrnu Nawrockis.