Samkaup hf. hafa verið dæmd til að greiða Netgenginu ehf., sem rekur Aha.is, rúmar 82,3 milljónir króna auk dráttarvaxta vegna ágreinings sem tengdist samstarfi fyrirtækjanna um netverslun Nettó.
Dómur féll í Héraðsdómi Reykjavíkur á miðvikudag. Netgengið hafði krafist tæplega 313 milljóna króna í skaðabætur auk vaxta og málskostnaðar. Samkaup kröfðust sýknu.
Samstarf fyrirtækjanna hófst árið 2017 þegar samið var um að vörur Nettó yrðu seldar í gegnum Aha.is. Nýr samstarfssamningur var gerður árið 2019. Netgengið sá meðal annars um netverslunarkerfið og heimsendingar en Samkaup um samantekt og afhendingu pantana.
Ágreiningur jókst í kjölfar mikils vaxtar netverslunar í heimsfaraldrinum. Deildu fyrirtækin meðal annars um tafir og mistök við afgreiðslu pantana og kostnað sem af þeim hlaust.
Netgengið byggði mál sitt meðal annars á því að Samkaup hefðu brotið gegn samningsskyldum og trúnaðarákvæðum með undirbúningi eigin netverslunar en Samkaup höfnuðu því .
Niðurstaða dómsins varð sú að Samkaup skyldu greiða Netgenginu 82.344.138 krónur með dráttarvöxtum frá 2. desember 2023 til greiðsludags. Þá voru Samkaup dæmd til að greiða tvær milljónir króna í málskostnað.
