Tæplega 18 ára ökumaður hefur verið dæmdur í fimm mánaða skilorðsbundið fangelsi fyrir stórhættulegan glæfraakstur á Siglufjarðarvegi í Skagafirði. Hann ók á allt að 193 kílómetra hraða þar sem hámarkshraði var 90 og missti stjórn á bifreiðinni með þeim afleiðingum að farþegar slösuðust, einn þeirra mjög alvarlega.
Dómur féll í Héraðsdómi Norðurlands vestra í dag. Atvikið varð að kvöldi 11. apríl 2025. Bifreiðin fór yfir á öfugan vegarhelming, út af veginum og valt þrisvar til fjórum sinnum.
Fjórir voru í bifreiðinni. Einn farþeganna hlaut meðal annars dreifðan heilaskaða, blóð í heilahólfum og lungnamar. Hann lá tæpan mánuð á gjörgæslu og glímir við alvarlegar afleiðingar slyssins. Annar farþegi hlaut meðal annars brot í háls og brjósthrygg.
Rannsókn lögreglu leiddi í ljós að raunhraði bifreiðarinnar rétt fyrir slysið var á bilinu 180 til 193 kílómetrar á klukkustund. Myndbönd sem tekin voru á Snapchat inni í bifreiðinni sýndu einnig hraðamælinn í um 190 kílómetrum á klukkustund.
Ástand bifreiðarinnar var jafnframt mjög slæmt. Hjólbarðar voru gamlir og morknir, hemlar í afar lélegu ástandi og veruleg tæring var í burðarvirki. Að mati bifvélavirkja hefði bifreiðin ekki átt að vera í umferð.
Dómurinn taldi aksturinn stórhættulegan og vítaverðan. Ökumaðurinn játaði brot sitt og hafði hreint sakavottorð. Fangelsisrefsingin var skilorðsbundin til tveggja ára og var hann sviptur ökuréttindum í tólf mánuði. Þá var honum gert að greiða alvarlega slasaða farþeganum 3,5 milljónir króna í miskabætur.
