Björgunarfólk notar krana til að leita í flaki lestanna að fólki sem óttast er að sé fast í rústunum eftir mannskætt háhraðalestarslys á Spáni. Að minnsta kosti 69 manns hafa látist í slysinu.

Meðal þeirra sem hafa verið staðfestir látnir eru Fátima Báñez, fyrrverandi atvinnumálaráðherra Spánar, og Julieta Gallego, 24 ára frjálsíþróttakona.

Alls voru 110 manns fluttir á sjúkrahús í Castilla-La Mancha eftir slysið. Af þeim hafa 60 verið útskrifaðir en 50 eru enn í meðferð.

Slysið varð á háhraðalestarlínunni milli Madrídar og Andalúsíu skömmu fyrir klukkan níu í gærmorgun. Lestir frá járnbrautarfyrirtækjunum Renfe og Iryo lentu í árekstri með þeim afleiðingum að lestarvagnar fóru út af sporinu og köstuðust niður brekku.

Þeir sem komust lífs af hafa lýst aðstæðum á vettvangi sem hreinni martröð. Einn þeirra sagði lestarvagnana hafa verið orðna að „afskræmdum málmhaugum“ og að umhorfs hefði verið eins og sprengja hefði sprungið.

Pedro Sánchez, forsætisráðherra Spánar, heimsótti slysstaðinn og lýsti yfir þriggja daga þjóðarsorg.

„Í dag syrgir öll þjóðin,“ sagði hann.