Sögufrægt einbýlishús við Eyrargötu 31 á Eyrarbakka hefur verið sett á sölu en óskað er eftir tilboði í eignina. Húsið, sem ber nafnið Hvoll, var reist árið 1913 og hefur meðal annars gegnt hlutverki sýslumannsbústaðar og prestsbústaðar.

Hvoll stendur á stórri sjávarlóð sem nær að sjóvarnargarðinum. Um er að ræða 2.290 fermetra lóð og frá efri hæð hússins er útsýni yfir hafið til suðurs og til fjalla í norðri.

Húsið er á þremur hæðum, kjallara, aðalhæð og risi, og er eitt af fyrstu steinsteyptu húsunum á svæðinu. Að utan er það klætt með standandi timburklæðningu.

Við endurbætur á eigninni hefur verið leitast við að varðveita upprunalegt yfirbragð hennar samhliða nútímaþægindum. Upprunaleg gólf eru að stórum hluta varðveitt á fyrstu og annarri hæð og áberandi burðarbitar setja svip sinn á húsið. Náttúruflísar eru í forstofu og sólstofu og gólfhiti í forstofu og baðherbergi á neðri hæð.

Miklar breytingar voru gerðar á Hvoli árið 1986. Þá var meðal annars byggður kvistur til austurs, sólstofu bætt við húsið og um 30 fermetra svefnherbergi útbúið á efri hæð. Úr herberginu er gengið út á suðursvalir með sjávarútsýni.

Við húsið er jafnframt um 75 fermetra pallur með skjólveggjum og er hægt að ganga þangað beint úr sólstofunni.

Tveir hólar eru á lóðinni og á annar þeirra sér sérstaka sögu. Hann var um árabil nýttur sem kartöflugeymsla þegar efri hluti garðsins var notaður undir kartöflur og aðra ræktun.

Hvoll hefur því staðið á Eyrarbakka í rúma öld og ber enn fjölmörg einkenni þeirrar sögu sem fylgt hefur húsinu frá árinu 1913.