Guðrún Birna Gísladóttir, fyrrverandi forstjóri hjúkrunarheimilisins Grundar, lést 20. október.

Morgunblaðið greinir frá andlátinu.

Guðrún fæddist á Grund við Hringbraut 1. júlí 1944. Hún varð þriðji ættliðurinn til að stýra Grund en afi hennar, sr. Sigurbjörn Ástvaldur Gíslason, var meðal stofnenda heimilisins.

Guðrún starfaði á Grund í 52 ár og tók við starfi forstjóra árið 1994. Hún var fyrsta konan hér á landi til að gegna forstjórastarfi á hjúkrunarheimili. Undir hennar stjórn stækkaði starfsemin verulega.

Guðrún eignaðist fjóra syni. Með fyrri eiginmanni sínum, sr. Páli Þórðarsyni, eignaðist hún Gísla Pál, Þórð Björn og Halldór Gunnar. Páll lést árið 1978. Með eftirlifandi eiginmanni sínum, Júlíusi G. Rafnssyni, eignaðist hún soninn Kjartan Örn.

Guðrún lét af störfum árið 2019 en sat áfram í stjórn Grundar til dánardags. Síðasta stjórnarfund sinn sat hún daginn fyrir andlátið.

Hún var sæmd riddarakrossi hinnar íslensku fálkaorðu árið 2023 fyrir umönnun og þjónustu við aldraða.