Breski stórleikarinn Ian McKellen minnist vinar síns og kollega, leikarans Sir Patrick Stewart, í einlægri færslu á Facebook. Stewart lést 28. október, 86 ára að aldri.
Í færslunni rifjar McKellen upp rúmlega hálfrar aldar vináttu þeirra, en þeir kynntust fyrst þegar báðir voru ungir og upprennandi leikarar hjá Royal Shakespeare Company.
McKellen segir að Stewart hafi fyrst og fremst verið mótaður af uppvexti sínum í Jórvíkurskíri á Norður-Englandi. Hann hafi verið afar stoltur af uppruna sínum og það hafi bæði heyrst á hreimnum og birst í hreinskilni hans.
„Jórvíkurskíris-búar hafa ekkert dálæti á hálfsannleik eða því að forðast erfið mál. Hann bar tilfinningar sínar utan á sér, sem gerði hann að manni sem hægt var að treysta á, dáðst að og, í mínu tilfelli, elska,“ skrifar McKellen.
Hann rifjar einnig upp þegar þeir hittust á götu í miðborg Lundúna nokkrum árum eftir fyrstu kynni sín. Þá hafði Stewart fengið tilboð um að taka við aðalhlutverki í vísindaskáldsagnaseríunni Star Trek.
McKellen segist hafa varað vin sinn við því að slíkt hlutverk gæti haft áhrif á leikhúsferil hans í Bretlandi og spurt hvort hann vildi virkilega hætta á að festast árum saman í Hollywood.
Stewart ákvað hins vegar að taka áhættuna og varð í kjölfarið heimsþekktur fyrir túlkun sína á Jean-Luc Picard skipstjóra í Star Trek. McKellen segir þá ákvörðun hafa verið gæfuspor, ekki aðeins fyrir aðdáendur þáttanna heldur einnig fyrir kvikmynda- og leikhúsáhorfendur um allan heim.
Stewart nýtti frægð sína til að leika í fjölda vinsælla kvikmynda, þar á meðal X-Men-myndunum, en hélt jafnframt áfram að sinna klassísku leikhúsi. Meðal höfunda sem hann túlkaði verk eftir voru William Shakespeare, Henrik Ibsen, Arthur Miller, Harold Pinter og Samuel Beckett. Hann lék bæði í Stratford-upon-Avon, West End-hverfinu í Lundúnum og á Broadway.
Stoltur af uppruna sínum til æviloka
Þótt Bandaríkin hafi orðið ættleitt heimaland Stewarts segir Ian að hann hafi aldrei gleymt rótum sínum. Þar kynntist hann eiginkonu sinni, Sunny, sem McKellen segir hafa staðið við hlið hans í gegnum súrt og sætt, veikindi og heilbrigði.
McKellen segir að eitt mesta afrek Stewarts hafi verið þegar hann var skipaður rektor Huddersfield-háskóla í Jórvíkurskíri. Hann segir það sérstaklega táknrænt að einn virtasti og ástsælasti leikari sinnar kynslóðar beggja vegna Atlantshafsins hafi verið svo stoltur af heimahögum sínum.
Að lokum bendir McKellen á að síðasta framkoma Stewarts á hvíta tjaldinu sé enn ókomin, en hann fer með hlutverk í væntanlegri Marvel-mynd, Avengers: Doomsday.
