Sigmundur Davíð Gunnlaugsson, formaður Miðflokksins, segist ekki hafa skýringar á reiðum höndum á því hvers vegna hann hafi verið fjarverandi í öllum 23 atkvæðagreiðslum sem fram hafa farið á Alþingi það sem af er þingi. Hann bendir þó á að atkvæðagreiðslur séu fáar í upphafi þings og að hann hafi tekið virkan þátt í umræðum.
Sigmundur Davíð ræddi fjarveru sína í ítarlegu viðtali við Vísi. Þar var hann spurður hvers vegna hann hefði ekki tekið þátt í neinni atkvæðagreiðslu á þinginu til þessa.
„Allar atkvæðagreiðslur? Ég veit það ekki. Ég hef nú tekið þátt í umræðunni meira en flestir en atkvæðagreiðslur fram að þessu hafa aðallega verið atkvæðagreiðslur um hvort leyfa skuli skýrslu eða eitthvað slíkt,“ sagði Sigmundur Davíð.
Hann sagði slíkar atkvæðagreiðslur hafa verið fáar, líkt og venja væri í upphafi þings, og taldi réttara að leggja mat á mætingu sína þegar þinginu lyki.
Þegar honum var bent á að um 23 atkvæðagreiðslur væri að ræða og hann spurður hvort hann væri orðinn þreyttur á þingstörfunum svaraði hann því neitandi. Hann sagðist meðal annars hafa verið erlendis í ferðum á vegum þingsins og því misst af einhverjum atkvæðagreiðslum.
„Nei, en ég hef verið í ferðum erlendis með þinginu og misst af einhverjum atkvæðagreiðslum þá en ég bara skal ekki segja, 23 atkvæðagreiðslur eru ekki mikið.“
Sigmundur Davíð benti jafnframt á að atkvæðagreiðslurnar yrðu líklega yfir þúsund áður en þinginu lyki. Hann lagði áherslu á að hann hefði mætt reglulega í fyrirspurnatíma og verið meðal þeirra þingmanna sem mest hefðu tekið til máls í upphafi þings.
Mannlíf kannaði þátttöku Sigmundar í atkvæðagreiðslum á síðasta þingi. Var hann fjarverandi 515 atkvæðagreiðslur, kaus Já 866 sinnum, kaus Nei 117 sinnum og sat hjá í 262 atkvæðagreiðslum samkvæmt vef Alþingis. Þýðir það að forsætisráðherrann fyrrverandi tók ekki þátt í tæplega 30% af atkvæðagreiðslum.
