Ummæli Elliða Vignissonar, bæjarstjóra Ölfuss, um innflytjendur og múslima komu til umræðu á Alþingi í dag þegar tveir þingmenn ræddu málefni útlendinga undir liðnum störf þingsins.
Elliði hafði áður skrifað á Facebook að óheftur straumur innflytjenda, sérstaklega múslima, væri að valda skaða. Hann sagði síðar í viðtali á Bylgjunni að gagnrýni hans beinist að innflytjendastefnu og hugmyndum sem byggi á trúarlegum kreddum eða venjum sem gangi gegn jafnrétti og frelsi.
Ása Berglind Hjálmarsdóttir, þingmaður Samfylkingarinnar, nefndi Elliða sérstaklega á nafn í ræðu sinni og gagnrýndi orð hans harðlega. Eiríkur Björn Björgvinsson, þingmaður Viðreisnar, nefndi bæjarstjórann ekki á nafn en ræddi orðræðu þar sem heilir hópar útlendinga eru settir undir sama hatt.
Segir ekki rétt að beina aðgerðum að heilum samfélagshópum
Eiríkur sagði mikilvægt að umræða um málefni útlendinga gæti farið fram af yfirvegun og ábyrgð. Stjórnvöld þyrftu að hafa stjórn á landamærum og bregðast við þegar reglur væru brotnar en forðast ætti alhæfingar um fólk vegna uppruna þess.
„Það er mikilvægt að geta rætt þessi mál af yfirvegun, ábyrgð og virðingu án þess að alhæfa eða setja t.d. alla útlendinga undir sama hatt,“ sagði Eiríkur.
Hann lagði áherslu á að útlendingar væru ekki einsleitur hópur og að margir þeirra legðu mikið af mörkum til íslensks samfélags. Greina þyrfti á milli þeirra sem fylgdu lögum og þeirra sem brytu þau og beina aðgerðum stjórnvalda að raunverulegum vandamálum.
„Ábyrg stefna felst í því að beina aðgerðum að raunverulegri áhættu en ekki heilu samfélagshópunum,“ sagði Eiríkur.
Hann sagði jafnframt að skipulögð glæpastarfsemi væri sérstakt viðfangsefni stjórnvalda og að verið væri að efla löggæslu, alþjóðlegt samstarf og viðbrögð gagnvart þeim sem misnotuðu kerfið eða ógnuðu öryggi almennings.
Ása vitnaði beint í Elliða
Ása Berglind gekk lengra og tengdi umræðuna beint við ummæli bæjarstjórans í Ölfusi. Hún sagðist nýkomin frá París þar sem evrópskir jafnaðarmenn hefðu rætt uppgang stjórnmálaafla sem reyndu að ná markmiðum sínum með sundrungu og árásum á minnihlutahópa.
Hún sagðist sjá merki um sambærilega þróun hér á landi og gagnrýndi bæði Miðflokkinn og Sjálfstæðisflokkinn í því samhengi.
„Það að segja, með leyfi forseta: „Óheftur straumur innflytjenda, sérstaklega múslima, er að valda skaða“, líkt og bæjarstjóri Ölfuss gerði, er ekki í lagi,“ sagði Ása.
Hún spurði jafnframt hvaða fólk Elliði hefði í raun átt við með ummælum sínum og nefndi meðal annars Jasminu Vajzovic sem hefur sjálf gagnrýnt ummæli Elliða.
Ása sagði kjörna fulltrúa og æðstu stjórnendur bera ábyrgð á því að byggja samfélagið upp í stað þess að gera tiltekna hópa tortryggilega.
„Það er eðlilegt að gera þá kröfu til okkar að geta rætt um samfélagsleg vandamál án þess að gera heilan trúarhóp tortryggilegan,“ sagði Ása.
Í lok ræðu sinnar vísaði hún til 233. gr. almennra hegningarlaga og minnti á ákvæði um opinber ummæli sem beinast gegn einstaklingum eða hópum vegna tiltekinna persónuþátta.
„Vöndum okkur,“ sagði Ása að lokum.
