Daði Már Kristófersson, fjármála- og efnahagsráðherra, segir uppsögn Harðar Arnarsonar, forstjóra Landsvirkjunar, hafa snúist um almennar áherslur í stjórnun fyrirtækisins. Hann segist engu hafa við skýringar stjórnar Landsvirkjunar að bæta.

Þetta kom fram í óundirbúnum fyrirspurnartíma á Alþingi þegar Guðlaugur Þór Þórðarson, þingmaður Sjálfstæðisflokksins, spurði ráðherrann um ástæður uppsagnar Harðar.

Hörður sagði starfi sínu lausu í byrjun mánaðar en hefur ekki tjáð sig opinberlega um ástæðurnar. Brynja Baldursdóttir, stjórnarformaður Landsvirkjunar, hefur hins vegar staðfest að ágreiningur hafi verið milli hans og stjórnar um áherslur í rekstri fyrirtækisins.

Guðlaugur Þór gagnrýndi svör ráðherrans og sagði málefni Landsvirkjunar ekki vera einkamál Viðreisnar.

Daði Már ítrekaði fyrri svör sín og sagði málið ekki flóknara en fram hefði komið.

„Ef um almennar stjórnunaráherslur er að ræða er engu við það að bæta. Hér er sagan öll,“ sagði Daði Már.