Nanna Margrét Gunnlaugsdóttir, þingmaður Miðflokksins, gagnrýndi harðlega fyrirkomulag við skipan í stjórnir ríkisfyrirtækja á Alþingi í dag og sakaði fjármálaráðherra um að fela sig á bak við valnefndir. Hún sagði embættismenn hafa fengið of mikil áhrif á skipan stjórnanna og beindi sérstaklega sjónum sínum að Viðreisn.

Nanna Margrét sagði að svar Daða Más Kristóferssonar fjármálaráðherra við fyrirspurn hennar sýndi að valnefndir væru langt frá því að koma að öllum stjórnarskipunum á vegum ráðuneytisins.

Samkvæmt henni skipar fjármálaráðherra í stjórnir 30 félaga en aðeins í 12 þeirra sé stuðst við valnefnd. Ráðherrann skipi sjálfur valnefndina sem skili honum tveimur nöfnum fyrir hvert stjórnarsæti og velji hann síðan á milli þeirra.

Í öðrum félögum sé farið eftir tillögum ráðuneytisins. Nanna Margrét sagði það þýða að embættismenn hefðu veruleg áhrif á hverjir veljast til stjórnarsetu.

„Alls sitja starfsmenn ráðuneytisins í 33 stjórnarsætum sem aðal- eða varamenn og meira að segja í félögum þar sem er valnefnd,“ sagði Nanna Margrét og spurði hvort yfir höfuð hefði verið auglýst eftir fólki til setu í viðkomandi stjórnum.

Hún sagði fyrirtækin vera í eigu landsmanna og að fjármálaráðherra bæri ábyrgð á því hverjir sætu í stjórnum þeirra. Að hennar mati hefði valdið hins vegar í auknum mæli verið fært frá kjörnum fulltrúum til embættismanna.

Nanna Margrét nefndi Isavia og Íslandspóst sérstaklega. Hún sagði öllum nema einum hafa verið skipt út úr stjórn Isavia á síðasta ári og að sá eini sem hélt sæti sínu hefði verið tilnefndur af Viðreisn. Þá hefði fulltrúi Viðreisnar hjá Íslandspósti færst úr varastjórn í aðalstjórn á sama tíma og öðrum hefði verið skipt út.

„Ótrúleg tilviljun að bara Viðreisnarfulltrúarnir reyndust hæfir. Hver trúir því?“ sagði hún.

Þingmaðurinn sagði Viðreisn gjarnan leggja áherslu á almannahagsmuni umfram sérhagsmuni en dró í efa að sú stefna birtist í framkvæmd ríkisstjórnarinnar.

„Leikritið heitir Froða og frasar, frú forseti. Viðreisn fer með aðalhlutverkið en handrit og leikstjórn eru algerlega í höndum embættismanna,“ sagði Nanna Margrét.

Hægt er að nálgast svar Daða í heild sinni hér.