Úkraínskir drónar réðust á Tambov-hérað í Rússlandi í nótt og kviknaði eldur í einu mannvirki, að sögn Yevgenys Pervyshevs, héraðsstjóra svæðisins. Hann vildi ekki veita frekari upplýsingar en sagði engan hafa slasast.
Úkraínska eftirlitsverkefnið Exilenova+ og sérfræðingar í greiningu opinna heimilda hjá óháðu Telegram-rásinni Astra telja að drónarnir hafi hæft Nikolskoye-dælu- og dreifistöðina í Michurinsky-héraði.
Nikolskoye-stöðin er mikilvægur hlekkur í Druzhba-olíuleiðslukerfinu, einu helsta flutningskerfi Rússlands fyrir hráolíu. Á stöðinni er tekið á móti olíu og olíuafurðum, þær geymdar og dælt áfram um leiðslukerfið. Afkastageta stöðvarinnar er allt að 300.000 tonn af olíu á dag.
Úkraínskir drónar réðust að minnsta kosti tvisvar á Nikolskoye-stöðina sumarið 2025.
Úkraínskar hersveitir hafa ítrekað gert árásir á rússneskar olíuhreinsistöðvar undanfarna mánuði. Herferðin gegn olíumannvirkjum hefur orðið einn helsti þátturinn í eldsneytiskreppunni í Rússlandi.
