Árið 2016 komst karlalandslið Íslands í knattspyrnu í átta liða úrslit á EM í knattspyrnu og var það í fyrsta sinn sem karlaliðið náði að komast á EM og var árangur liðsins mun betri en flestir áttu von á.
Í hálfleik í landsleik Íslands við Lúxemborg sem fór fram 16. nóvember voru leikmenn liðsins heiðraðir af KSÍ. Í tilefni þess að tíu ár eru liðin frá þessu afreki mun Mannlíf á næstunni fjalla um nokkra af helstu leikmönnum liðsins á mótinu.
Sá fyrsti er Theodór Elmar Bjarnason.
Efnilegur frá upphafi
Theodór Elmar er fæddur árið 1987 og var snemma ljóst að hann væri efnilegur knattspyrnumaður og var valinn besti leikmaður Shell-mótsins í Vestmannaeyjum árið 1997. Margir aðrir þekktir landsliðsmenn hafa hlotið þessi verðlaun og þykja þau ágætis vísbending um framtíðargetu í íslenskri knattspyrnu. Arnar Þór Viðarsson, Bjarni Guðjónsson, Kolbeinn Sigþórsson og Arnór Smárason eru skýr dæmi um það.
Theodór Elmar var þó ekki aðeins þekktur fyrir knattspyrnu á sínum yngri árum heldur varð hann meðal annars Íslandsmeistari í körfubolta með KR í 9. flokki og spilaði þar meðal annars með framtíðarlandsliðsmönnum Brynjari Þór Björnssyni og Darra Hilmarssyni.
Það var þó árin 2003 og 2004 sem hinn almenni knattspyrnumaður fór að þekkja til KR-ingsins en þá hóf hann að spila með yngri landsliðum Íslands og meistaraflokki KR. Spilaði hann tíu leiki í efstu deild með KR árið 2004 og tvo leiki í bikaranum.
Sama ár var tilkynnt að Theodór Elmar og Kjartan Henry Finnbogason hefðu verið keyptir til skoska stórliðsins Glasgow Celtic en þeir spiluðu saman hjá KR.
Á þorláksmessu 2004 fengu Íslendingar að kynnast knattspyrnukappanum betur í viðtali við Fréttablaðið. Í viðtalinu sagði Theodór Elmar frá áhugamálum sínum og nefndi sérstaklega bandaríska söngvarann Usher þegar hann var spurður um tónlistarsmekk sinn.
„Ég er hrifinn af allri tónlist en er langmest fyrir R&B. Hlusta mikið á FM 95,7 og 89,5. Fíla Usher ansi vel, en finnst þessi tónlistartegund almennt töff, takturinn er flottur og kemur manni yfirleitt í góðan gír.“
Hann hafði nýlokið við Engum líkur, ævisögu Davids Beckham. Hann sagði fótboltann hafa vakið áhuga sinn á bókinni og kvaðst dást að því hvernig Beckham héldi ró sinni þrátt fyrir stöðugan ágang og kjaftasögur.
París var uppáhaldsborg hans samkvæmt viðtalinu. Þangað hafði hann farið tíu ára gamall í sinni fyrstu utanlandsferð eftir að hafa unnið sér þátttökurétt á litlu heimsmeistaramóti með því að halda bolta á lofti og rekja hann. Hann sagði ferðina þá skemmtilegustu sem hann hefði farið í og nefndi mannlífið, menninguna og tungumálið meðal þess sem heillaði hann við borgina.
Fram undan var þó annars konar utanlandsferð. Theodór sagði það skrýtna tilhugsun að kveðja Ísland og KR til að fara í atvinnumennsku en kvaðst spenntur fyrir því að hefja leik með Celtic.
Þetta var þó ekki fyrsta reynsla miðjumannsins erlendis og hafði spilað með Start í Noregi og Stoke í Englandi.
„Ég var þar þangað til ég varð fimmtán en þá fluttist ég til Noregs til pabba. Þar spilaði ég mikið með varaliðinu hjá Start í 3. deildinni og fór síðan að æfa með aðalliðinu sextán ára. Ég fékk heimþrá en fór reyndar út til Stoke í einn mánuð áður en ég hélt heim. Mér leist ekki alveg nægilega vel á þetta hjá Stoke, aðallega vegna þess að mér fannst borgin ekki henta, er verkamannaborg. Svo kom ég heim og spilaði eitt tímabil með KR,“ sagði leikmaður við DV sumarið 2005. Hann greindi jafnframt frá því að honum hefði staðið til boða að ganga til liðs við hollensku liðin Heerenveen og Feyenoord.
Ljóst er að miklar væntingar voru gerðar til Theodórs, sem þá var fyrirliði U19 landsliðsins, en í sömu grein er talað við Willum Þór Þórsson, þáverandi þjálfara Vals og fyrrum þjálfara KR-ingsins.
„Þegar litið er á tæknina þá er Elmar einn sá allra besti sem ég hef komist í tæri við, alveg síðan Rúnar Kristinsson var að koma inn í KR-liðið. Það sem einkennir hann er rosalega jákvætt hugarfar. Hann hefur þroska á við leikmann sem hefur spilað mjög lengi. Hann spilaði nokkra leiki hjá KR í fyrra en hefði líklega spilað enn stærra hlutverk ef hann hefði ekki meiðst rétt fyrir mót. Það er dæmigert fyrir hann hvernig hann vann sig í gegnum meiðslin, hann leggur bara á sig aukalega og vinnur eins og margreyndur leikmaður.“
Síðar á árinu var hann svo valinn í U21 landsliðið og sagði DV frá því að boltatækni Theodórs hefði verið líkt við boltatækni Cristiano Ronaldo sem þá lék með Manchester United.
Því miður fyrir Theodór náði hann aldrei að festa sig í sessi hjá Celtic þrátt fyrir mikið lof þjálfara hjá vara- og unglingaliðum liðsins. Spilaði hann aðeins einn leik með aðalliðinu á þeim fjórum árum sem hann lék í Skotlandi en það var í tapi á móti Hibernian og þá var hann ónotaður varamaður í úrslitum skoska bikarsins árið 2007 þegar Celtic vann Dunfermline.
Hann náði þó að spila sína fyrstu leiki með A-landsliði karla meðan hann var á mála í Skotlandi og lék þrjá leiki með landsliðinu 2007, þá 20 ára gamall.
Tíð félagsskipti en ávallt byrjunarliðsmaður
Í janúar 2008 gekk Theodór Elmar til liðs við Lyn í Noregi en Celtic hafði hafnað tilboðum frá danska liðinu Viborg og sænska liðinu Gautaborg en liðið var ríkjandi deildarmeistari í Svíþjóð á þeim tíma.
Óhætt er að segja að honum hefði gengið vel í Noregi en Íslendingurinn spilaði nær alla leiki liðsins. Hann var seldur þegar annað tímabil hans var hálfnað vegna fjárhagsörðugleika Lyn og var það einmitt hið sænska Gautaborg sem keypti Theodór.
Velgengni hans hélt áfram í Svíþjóð og var hann fastamaður í sænska liðinu í tvö og hálft ár en gekk svo til liðs við hið danska Randers árið 2012 þar sem hann spilaði alla leiki eftir að hafa náð að hrista eftir erfið meiðsli. Árið 2015 gekk hann svo til liðs við AGF í Danmörku og hélt áfram uppteknum hætti þar.
Hann tók þó heldur betur óvenjulega ákvörðun þegar hann gekk til liðs við Elazığspor í Tyrklandi en liðið lék þá í næstefstu deild þar í landi. Töldu sumir landsliðsmanninn vera að taka stórt skref niður í getustigi en var þetta árið 2017 og Theodór aðeins þrítugur. Lék hann með tveimur öðrum liðum í næstefstu deild í Tyrklandi en það voru Gazişehir Gaziantep og Akhisarspor.

Á meðan hann bjó í Tyrklandi reið yfir stór jarðskjálfti sem hafði stór áhrif á samfélagið en talið er að 117 manns hafi látist í Tyrklandi af völdum hans. Í viðtali við RÚV sagði landsliðsmaðurinn frá sinni upplifun.
„Við vorum bara í íbúðinni okkar uppi á 21. hæð. Við fundum mjög vel fyrir þessu. Blokkin dúaði öll. Það var svolítið óhugnalegt en maður hefur svo sem upplifað aðra skjálfta hérna síðan við fluttum en ekki alveg svona kraftmikla,“ sagði fótboltasnillingurinn. „Núna er bara allt á fullu í að reyna að bjarga einhverju fólki sem er fast í einhverjum rústum og það er náttúrulega bara sjokk held ég hjá flestum og fólk er að reyna að átta sig á þessu.“
Í byrjun árs 2021 hóf hann að spila með gríska liðinu Lamia sem spilaði þá í efstu deild og þrátt fyrir að vera ekki fastamaður í byrjunarliðinu spilaði hann nær alla leiki liðsins.
Hann hélt svo heim til Íslands í kjölfarið og spilaði þrjú ár með KR þar sem hann var byrjunarliðsmaður og tók að lokum eitt tímabil með Knattspyrnufélagi Vesturbæjar.
Stærsta stundin á ferlinum
Eins og áður sagði spilaði Theodór Elmar sinn fyrsta landsleik árið 2007, en sá leikur var á móti Lúxemborg og fór fram á Laugardalsvelli 2. .júní. Hann kom inn á fyrir Emil Hallfreðsson á 82. mínútu leiksins, en Eyjólfur Sverrisson var landsliðsþjálfari þá.
Theodór spilaði 41 leik á 11 ára tímabili með landsliðinu og var reglulega í byrjunarliði á þeim tíma þrátt fyrir mikla samkeppni.
Hann skráði sig þó heldur betur í sögubækur landsliðsins á EM 2016 þegar hann átti stoðsendingu í sigurmarki Arnórs Ingva Traustasonar í leik gegn Austurríki sem varð til þess að Ísland komst upp úr riðli sínum á mótinu.

Þá skoraði hann sitt eina landsliðsmark í undankeppni HM 2018 á móti Tyrklandi og átti sinn þátt í að koma liðinu á HM og var á endanum ekki valinn til þátttöku á lokamótinu.
Síðasti landsleikur hans var í 6-0 tapi fyrir Sviss í Þjóðadeildinni 8. september 2018.
Einkalífið í sviðsljósinu
Theodór Elmar kynntist fyrirsætunni Pöttru Sriyanonge í Noregi og byrjuðu þau saman árið 2009. Þremur árum síðar, 20. desember 2012, gengu þau í hjónaband. Þau bjuggu saman erlendis um árabil meðan Theodór var atvinnumaður og eignuðust tvö börn.
Pattra starfar sem markaðsstjóri gleraugnaverslunarinnar Sjáðu. Hún hefur einnig starfað sem fyrirsæta og haldið úti tískubloggi. Voru þau árum saman eitt þekktasta par landsins og þóttu bæði gífurlega glæsileg.
Eftir að leiðir Theódórs Elmars og Pöttru árið 2025 skildu greindi Morgunblaðið frá því í haust að hann væri kominn í samband með Móheiði Guðmundsdóttur, leik- og söngkonu. Samkvæmt frétt blaðsins hófst samband þeirra í sumar.
Veistu meira? Láttu okkur vita
Það tókst ekki að sækja formið. Reyndu aftur eftir augnablik.





































Athugasemdir