Bið eftir innlögn af bráðamóttöku Landspítala hefur styst verulega eftir opnun nýrrar bráðamatsdeildar fyrir rúmum mánuði samkvæmt tilkynningu frá stjórnvöldum. Fyrstu niðurstöður benda til þess að breytingar á bráðaþjónustu spítalans séu þegar farnar að skila árangri.

Bráðamatsdeildin er með tuttugu rúm og tekur við sjúklingum sem þurfa frekara mat og meðferð lyflækna eftir fyrstu rannsóknir og meðferð á bráðamóttöku.

Mánuðinn áður en deildin var opnuð var bið eftir innlögn að meðaltali 26,5 klukkustundir en er nú 15,2 klukkustundir. Biðin hefur því styst um 43 prósent samkvæmt tilkynningunni.

Dvalartími á bráða og göngudeild G3 hefur einnig styst þrátt fyrir fjölgun koma. Þá hefur bið eldra fólks eftir hjúkrunarrými að lokinni sjúkrahúsmeðferð styst samhliða opnun tæplega 270 hjúkrunarrýma á síðustu 12 til 13 mánuðum að sögn stjórnvalda.

Alma D. Möller heilbrigðisráðherra fagnar niðurstöðunum.

„Hér sjáum við frábæran árangur af öflugri uppbyggingu stjórnvalda á hjúkrunarrýmum líkt og lofað var, þéttu og góðu samstarfi heilbrigðisráðuneytisins og Landspítala og markvissu þróunarstarfi og nýsköpun innan spítalans sjálfs til að efla og bæta þjónustu við sjúklinga,“ segir Alma.