Reykjavíkurborg segir hefur rekið 50 manns samkvæmt tilkynningunni frá borginni. Borgaryfirvöld áætla að aðgerðirnar geti skilað um 1,3 milljörðum króna í árlegan sparnað, en um er að ræða áætlaða fjárhæð.
Borgarstjórn samþykkti aðgerðirnar í dag. Þær eiga samkvæmt útreikningum borgarinnar að leiða til fækkunar sem nemur 73,8 stöðugildum. Auk uppsagnanna er þar meðal annars reiknað með áhrifum starfsmannaveltu, tímabundinna starfa og stöðvunar ráðninga.
Þremur þeirra 50 starfsmanna sem sagt verður upp verður boðið annað laust starf. Þeim sem missa vinnuna býðst aðstoð sálfræðinga og ráðgjöf við atvinnuleit.
Aðgerðirnar ná til fimm sviða og tveggja skrifstofa borgarinnar en ekki skóla- og frístundasviðs eða velferðarsviðs.
Borgin stefnir að því að hlutfall stöðugilda í miðlægri starfsemi verði að hámarki 7,5 prósent af heildarstöðugildum.
Reykjavíkurborg áætlar jafnframt að hagræðingar- og stjórnkerfisbreytingar frá því í júní geti lækkað launakostnað um samtals 2,3 milljarða króna á ársgrundvelli. Sú tala byggir á mati og forsendum borgarinnar um fjárhagsleg áhrif aðgerðanna og liggur því ekki fyrir sem staðfestur sparnaður.
„Með þessum aðgerðum lýkur þriðja og síðasta áfanga þeirrar umfangsmiklu fækkunar stöðugilda sem við höfum þurft að ráðast í undanfarna mánuði í miðlægri stjórnsýslu. Þetta hafa verið erfiðar en nauðsynlegar ákvarðanir sem ekki eru teknar af léttúð. Að baki þessum tölum er fólk sem hefur sinnt mikilvægum störfum og ég vil þakka því fyrir þeirra framlag til borgarinnar í gegnum árin. Fjárhagsstaða Reykjavíkurborgar er grafalvarleg. Borgin hefur verið rekin með miklum halla undanfarin ár og við þeirri stöðu verður að bregðast af festu og ábyrgð. Við höfum lagt áherslu á að beina hagræðingaraðgerðum fyrst og fremst að stjórnun, innri þjónustu og miðlægri stjórnsýslu og þannig staðið vörð um grunnþjónustu við borgarbúa. Það er ábyrgð okkar kjörinna fulltrúa að ná tökum á rekstrinum og lækka vaxtabyrði borgarinnar. Aðeins þannig getum við staðið vörð um grunnþjónustuna og tryggt nauðsynlegar fjárfestingar til framtíðar,“ segir Hildur Björnsdóttir, borgarstjóri Reykjavíkur.
