Leikkonan Pálína Jónsdóttir hefur sett fallega þriggja herbergja íbúð við Hverfisgötu 16 í Reykjavík á sölu. Pálína er meðal annars þekkt fyrir hlutverk Eyrúnar eyðsluklóar í barnaleikritinu Áfram Latibær.

Ásett verð eignarinnar er 69,9 milljónir króna.

Íbúðin er 70,6 fermetrar að stærð og er á annarri hæð í steinsteyptu húsi sem reist var árið 1918. Húsið stendur í hjarta Reykjavíkur og einkennist íbúðin meðal annars af mikilli lofthæð og fallegum loftlistum.

Íbúðin skiptist í stofu, tvö svefnherbergi, eldhús og baðherbergi auk geymslu í kjallara. Komið er inn í parketlagt hol og eru bæði svefnherbergin einnig parketlögð. Í öðru þeirra eru rúmgóðir fataskápar sem ná yfir heilan vegg.

Stofan er björt og parketlögð. Í eldhúsinu eru efri og neðri skápar, uppþvottavél og Porcelanosa flísar á milli skápa. Á baðherberginu eru Mustang flísar á gólfi og Porcelanosa flísar í sturtuklefa. Þar er jafnframt tengi fyrir þvottavél og þurrkara.

Töluvert hefur verið ráðist í framkvæmdir á íbúðinni og húsinu undanfarin ár og hefur húsið sjálft hefur einnig fengið viðhald.