Nýtt bókaforlag, Ýtar, er í undirbúningi með það að markmiði að gefa út vandaðar skáldsögur og léttlestrarbækur á íslensku fyrir fólk af erlendum uppruna, auk skáldverka fyrir almennan markað. Söfnun á Karolina Fund á að fjármagna stofnun forlagsins og fyrstu útgáfu þess.
Markmiðið með Ýtum er að gera fólki á öllum aldri og á mismunandi stigum íslenskunáms kleift að njóta alvöru skáldskapar á íslensku. Jafnframt verður lögð áhersla á útgáfu grípandi skáldsagna fyrir almennan markað.
Nafnið Ýtar er fornt íslenskt orð yfir fólk og er einkum notað í skáldamáli. Aðstandandi forlagsins segir nafnið endurspegla hugmyndina um að færa fólki sögur sem opna nýja heima, efla lestraráhuga og brúa bil milli fólks.
Bækur fyrir ólíka lesendur
Meðal verkefna forlagsins er útgáfa skáldsögunnar Frá norðri til nýrra heima. Hún segir frá viðskiptajöfri sem missir vinnuna í janúar og heldur til Skotlands á snekkju sinni. Þegar hann verður vitni að því að vinur hans er myrtur tekur ferðin óvænta stefnu og leiðir hann í heimsreisu um fimm heimsálfur. Á leiðinni bíða hans hættuleg ævintýri, ást og persónuleg umbreyting.
Einnig er stefnt að útgáfu bókarinnar Hvað leynist í kistlinum, sem er ætluð fólki sem er komið á þriðja stig í íslenskunámi. Hún hefur að geyma 12 stuttar og sjálfstæðar sögur sem eiga að gera lesturinn aðgengilegan og skemmtilegan. Bókin er nú í lokaprófarkalestri og unnið er að kápuhönnun.
Þá eru aðeins um 90–100 eintök eftir af Handan dalanna, annarri léttlestrarbók sem hefur selst vel. Hún inniheldur einnig 12 sjálfstæðar sögur úr ólíkum áttum.
Hugmyndin kviknaði af eigin reynslu
Aðstandandi forlagsins, Kristín Guðmundsdóttir er menntaður matartæknir og starfaði við fagið í nokkur ár. Þar tók hún eftir því að fólk af erlendum uppruna átti erfitt með að finna íslenskt lesefni við hæfi. Bækurnar sem stóðu til boða voru oft ætlaðar börnum eða skrifaðar á flóknu og gamaldags máli.
Árið 2014 hóf hún því að þróa hugmyndir að léttlestrarbókum fyrir þennan hóp. Fyrsta bókin, Nýjar slóðir, kom út á árunum 2019–2020 og gekk vel. Síðan hefur hann gefið út eina bók á ári og byggt upp fastan hóp lesenda og viðskiptavina bæði hérlendis og erlendis.
Bækurnar fjalla um fjölbreytt efni, allt frá íslenskri sögu og menningu til ævintýra og sagna þar sem dýr og hlutir fá sjálfstætt líf. Að ósk lesenda eru flókin orð og orðasambönd einnig útskýrð í flestum bókunum.
Kristín þekkir sjálf hvernig það er að læra nýtt tungumál í öðru landi og segir þá reynslu hafa haft áhrif á hugmyndina. Kennarar hafi jafnframt bent á þörfina fyrir bækur af þessu tagi.
Söfnun á Karolina Fund
Söfnun á Karolina Fund er ætlað að gera kleift að stofna Ýtar bókaforlag formlega. Fjármunirnir munu meðal annars fara í skráningu fyrirtækisins, vörumerkjavernd, faglega kápuhönnun, prentun skáldsögunnar Frá norðri til nýrra heima og gerð vefsíðu.
Jafnframt er stefnt að opnunar- og útgáfuhófi fyrir stuðningsfólk verkefnisins.
Markmiðið til framtíðar er að byggja upp fjölbreyttan útgáfuflokk fyrir fólk af erlendum uppruna á öllum aldri og öllum stigum íslenskunáms, um leið og skáldsögur fyrir almennan markað fá sinn sess.
