Bríet er mætt með glænýtt lag en Last Dance kom út á miðnætti 19. október og samhliða útgáfunni frumsýndi hún nýtt tónlistarmyndband við lagið á YouTube.

Bríet hefur fyrir löngu skipað sér sess meðal vinsælustu tónlistarkvenna landsins en fyrsta breiðskífa hennar, Kveðja, Bríet, kom út árið 2020. Platan sló rækilega í gegn og ári síðar fór Bríet heim með þrenn verðlaun á Íslensku tónlistarverðlaununum, fyrir plötu ársins, söngkonu ársins og textahöfund ársins.

Nýja lagið er unnið í samstarfi við Lárus Arnarson, betur þekktan sem daysof1993. Hann framleiðir lagið en Bríet og Lárus sömdu það saman.

Last Dance fjallar um þá erfiðu en jafnframt frelsandi stund þegar maður áttar sig á því að kominn sé tími til að halda áfram, jafnvel þótt ekki sé alveg ljóst hvað taki við.

Bríet segir að hún hafi viljað fanga tilfinninguna sem fylgir því að treysta eigin innsæi og þora að skilja hið kunnuglega eftir.

„Mig langaði að fanga þá tilfinningu að treysta innsæinu sínu svo fullkomlega að maður sé tilbúinn að skilja allt eftir sem maður þekkir, jafnvel fólkið sem maður elskar, og stíga út í óvissuna,“ segir Bríet.

Boðskapurinn er því nokkuð skýr. Stundum þarf einfaldlega að kveðja, taka einn síðasta dansinn og halda svo áfram.

„Maður verður bara að halda áfram og fara sína eigin leið og treysta því að maður finni út úr hlutunum á leiðinni,“ segir Bríet.