Gervigreind hefur á undanförnum árum troðið sér inn á sífellt fleiri svið daglegs lífs og nú verður hún tekin sérstaklega fyrir á Borgarbókasafninu Spönginni.
Mánudaginn 19. október verður fyrsta Fræðakaffi haustsins haldið þar sem Saga Úlfarsdóttir, sérfræðingur í gervigreind, ætlar að ræða tækifærin og áskoranirnar sem fylgja þessari ört vaxandi tækni.
Spurningarnar eru enda margar. Þurfum við að hafa áhyggjur af gervigreindinni eða er hún einfaldlega nýtt verkfæri sem getur sparað okkur tíma og vinnu? Og hvað gerist þegar stafrænn vinnufélagi verður allt í einu hluti af vinnudeginum?
Saga mun meðal annars ræða hvernig gervigreind er þegar farin að hafa áhrif á daglegt líf fólks og störf og hvaða áhrif hún gæti haft á vinnustaði, samfélagið og framtíðina.
Saga er verkfræðingur með sérhæfingu í gagnavísindum og gervigreind. Hún hefur meðal annars starfað sem Head of AI hjá Travelshift og sem ráðgjafi í gervigreindarteymi Advania. Í dag rekur hún eigið ráðgjafarfyrirtæki þar sem hún aðstoðar fyrirtæki við að nýta gervigreind á ábyrgan hátt.
Fræðakaffið fer fram á Borgarbókasafninu Spönginni mánudaginn 19. október frá klukkan 16:30 til 17:30. Viðburðaröðin Fræðakaffi hefur verið haldin reglulega í Spönginni og notið mikilla vinsælda.
