Stefán Pálsson sagnfræðingur og varaborgarfulltrúi hjá Vinstri grænum gagnrýnir efnahagsstefnu ríkisstjórnarinnar í Facebook-færslu og segir þúsundir Íslendinga hafa misst atvinnuna vegna aðgerða sem stjórnvöld hafi sjálf sagt nauðsynlegar til að ná tökum á verðbólgu.

Stefán vísar til fréttar þar sem Ragnar Þór Ingólfsson, félags- og húsnæðismálaráðherra segir Seðlabankann hafa „spilað með líf fólks“ ef bankinn hafi vísvitandi skapað efnahagsaðstæður sem auki atvinnuleysi.

Í færslu sinni bendir Stefán á að Seðlabankinn sé að framfylgja efnahagsstefnu ríkisstjórnarinnar. Hann rifjar jafnframt upp ummæli fjármálaráðherra frá því í vor, þar sem fram kom að atvinnuleysi gæti aukist vegna aðgerða stjórnvalda gegn þensluverðbólgu.

„Það verður ekki tekið af ríkisstjórninni að henni hefur tekist að ná markmiðum sínum,“ skrifar Stefán og vísar til fjölgunar atvinnulausra og bætir síðan við:

„Atvinnulausum Íslendingum hefur fjölgað um mörgþúsund manns með tilheyrandi áhrifum á líf og sjálfsvirðingu alls þessa fólks.“

Færslan vakti mikla athygli og voru ekki allir á eitt sáttir með hana.

Viktor Orri Valgarðsson, stjórnmálafræðingur og fyrrum varaþingmaður Pírata er einn af þeim sem gagnrýnir orð Stefáns.

„Frekar lélegt að túlka þessi orð sem svo að það sé sérstakt markmið að auka atvinnuleysi... það er augljóslega hvorki það sem hann sagði eða meinti.“

Fjölmiðlamaðurinn Egill Helgason bendir á að um sé að ræða „hreinskilni.“

„Þetta heitir einfaldlega hreinskilni. Háir vextir draga úr umsvifum í hagkerfinu sem þýðir að sumt fólk missir atvinnuna.“

Ásdís Auðunsdóttir, veðurfræðingur og framhaldsskólakennari, húðskammar Stefán í eftirfarandi athugasemd:

„Þú setur samasemmerki milli þess að ,,það sé markmið ríkisstjórnarinnar að auka atvinnuleysi" (þín orð) og að fjármálaráðherra segi ,,óhjákvæmilegt að atvinnuleysi aukist vegna aðgerða ríkisstjórnarinnar". Skoðum dæmi: Alkóhólisti kemur á vog í tveggja vikna heildræna áfengismeðferð. Meðferðaraðilinn segir óhjákvæmilegan fyligifisk að líða sársauka á meðan á afvötnun stendur. Mbl/Stefán Pálsson skrifar grein með fyrirstögnina: ,,Meðferðaraðili hefur það að markmiði að sá sem kemur í afvötnun líði vítiskvalir". Í alvöru Stefán, er svona málflutningur boðlegur? Eins og RÞI benti á í þessu viðtali þá er ríkisstjórnin að vinda ofan af ábyrgðarleysi fyrri ríkisstjórna með að boða hallalaus fjárlög. Tékki var alltaf skrifaður á seinni tíma og vaxtakostnaður ríkisins var gífurlegur.“