Ferðamaður er sagður hafa valdið miklum eldsvoða á Balí í Indónesíu þegar hann reyndi að fæla könguló úr lúxusvillu sem hann dvaldi í. Villan eyðilagðist í eldinum en verðmæti hennar var talið nema um 112 þúsund Bandaríkjadölum.

Samkvæmt upplýsingum lögreglu tók atvikið óvænta stefnu þegar 45 ára ferðamaður frá Nepal kom auga á könguló inni á baðherbergi villunnar. Hann kveikti í pappírsblaði í þeirri von að eldurinn myndi fæla köngulóna á brott.

Eftir að hafa kveikt í pappírnum yfirgaf maðurinn baðherbergið og fór inn í annað herbergi. Þá virðist vindur hafa feykt brennandi pappírnum að þaki hússins.

Þak villunnar var úr þurru alang-alang grasi, hefðbundnu byggingarefni sem notað er í stráþök á Balí. Eldurinn náði fljótt tökum á þakinu og vegna mikils vinds breiddust logarnir hratt út um bygginguna.

Lögregla segir að eldurinn hafi á skömmum tíma náð til allra hluta villunnar og hafi hún eyðilagst í eldsvoðanum. Um tíma voru einnig áhyggjur af því að eldurinn gæti borist yfir í nærliggjandi hús en það gerðist ekki.

Enginn slasaðist í eldsvoðanum.

Ekki liggur fyrir hvort ferðamaðurinn verði látinn sæta ábyrgð vegna atviksins eða hvort hann þurfi að bæta tjónið.

Svipað atvik kom upp í Bandaríkjunum fyrr á árinu þegar maður í Pennsylvaníu var sakaður um að hafa kveikt í heimili sínu í tilraun til að drepa köngulær. Eldurinn eyðilagði heimili hans og olli jafnframt skemmdum á þremur samliggjandi fasteignum.