Góð samskipti og tilfinningalegt öryggi geta skipt verulegu máli þegar kemur að ánægju fólks í langtímasamböndum. Nýleg rannsókn sem birt var í vísindatímaritinu Family Process bendir til þess að bætt samskipti og aukið tilfinningalegt öryggi tengist meiri ánægju í samböndum.
Sambands- og kynlífsráðgjafinn Tammy Nelson segir jafnframt að sambönd þróist með tímanum og að fólk þurfi að leggja rækt við þau. Hún nefnir fimm algeng mistök sem geti smám saman dregið úr nánd og tengslum para.
1. Að telja sig vita allt um makann
Nelson segir forvitni mikilvægan þátt í ástarsamböndum. Þegar fólk telur sig þegar vita hvað makinn hugsar, vill eða hefur áhuga á geti það hætt að spyrja spurninga og sýna honum raunverulegan áhuga.
Smekkur, langanir og framtíðarsýn fólks geti hins vegar breyst með árunum. Hún hvetur fólk því til að halda áfram að spyrja maka sinn hvað hann vilji, hvert hann stefni og hvernig hann sjái framtíðina fyrir sér.
2. Að forðast erfið samtöl
Þögn er ekki endilega merki um að allt sé í góðu lagi. Að mati Nelson geta pör sem forðast ágreining og erfið málefni jafnvel verið í viðkvæmari stöðu en þau sem rífast en ræða málin opinskátt.
Hún ráðleggur fólki sérstaklega að velta fyrir sér hvaða umræðuefni það forðast. Þar geti til dæmis verið um að ræða fjármál, kynlíf eða önnur viðkvæm mál. Mikilvægt sé að skapa svigrúm fyrir slík samtöl.
3. Að einblína á það sem er að í kynlífinu
Þegar rætt er um kynlíf telur Nelson árangursríkara að leggja áherslu á það sem gengur vel en að telja upp það sem makinn gerir ekki eða það sem vantar.
Hún ráðleggur pörum að segja hvort öðru hvað þeim líkar og hvað þau vilji upplifa meira af. Þannig sé hægt að byggja áfram á því sem þegar virkar í stað þess að skapa varnarviðbrögð og átök.
4. Að festast í daglegum rekstri sambandsins
Reikningar, heimilisstörf, börn, vinna og önnur verkefni geta orðið fyrirferðarmikill hluti sambands. Nelson kallar þetta viðhaldsham og segir hann nauðsynlegan.
Hann megi þó ekki taka algjörlega yfir. Pör þurfi einnig að vera í því sem hún kallar vaxtarham, þar sem þau prófa nýja hluti, skapa sameiginlegar upplifanir og brjóta upp hversdagsleikann. Jafnvægi þurfi að vera milli stöðugleika og nýrra upplifana.
5. Að halda jákvæðum tilfinningum fyrir sig
Síðustu mistökin felast í því að finna fyrir væntumþykju og tengingu við makann án þess að tjá hana.
Nelson hvetur fólk til að segja maka sínum þegar hugsunin um hann vekur hlýju, gleði eða öryggi. Einföld orð um slíkar tilfinningar geti haft mikil áhrif.
Að hennar mati byggist sterkt langtímasamband því ekki eingöngu á samhæfni heldur stöðugri athygli, samskiptum og vilja beggja aðila til að halda áfram að kynnast hvort öðru.
