Hlaðvarpið Tvær taktlausar hefur undanfarið vakið mikla kátinu á mörgum en umsjónarkonur þess eru Íris Kristín Smith, grunnskólakennari og grínisti, og Kristín Viðarsdóttir, kjarnastjóri á leikskóla.

Í nýjasta þætti hlaðvarpsins segir Íris Kristín meðal annars frá heldur óvenjulegu atviki sem átti sér stað þegar hún fór ásamt hópi kennaravinkvenna á Kalda bar í Reykjavík.

Íris segir hópinn hafa verið í góðu skapi og töluvert stuð hafi verið á vinkonunum. Það hafi hins vegar ekki fallið í kramið hjá öðrum gestum staðarins.

„Það var einhver vinkonuhópur, eldri konur sem hlusta ábyggilega ekki á þáttinn. Þær semsagt kvörtuðu undan okkur vegna hávaða,“ segir Íris.

Að hennar sögn hafi konurnar ekki aðeins gert athugasemd við hávaðann heldur einnig spurt vinkonurnar hvað þær störfuðu við. Þegar þær sögðust vera kennarar hafi svarið komið Írisi nokkuð á óvart.

„Þið eruð ekki góðar fyrirmyndir,“ segir Íris að konurnar hafi sagt.

Kristín furðaði sig á athugasemdinni og spurði fyrir hvern þær ættu að vera fyrirmyndir á bar á laugardagskvöldi.

Kvörtuðu yfir kvörtuninni

Íris viðurkennir að hún eigi erfitt með árekstra af þessu tagi og hafi fyrst brugðist við með því að draga sig í hlé.

„Ég sat alveg í hnipri. Ég var bara getum við hætt, getum við farið,“ segir hún.

Málið hafi þó ekki verið úr sögunni. Konurnar hafi einnig kvartað við þjón á staðnum en að sögn Írisar hafi þjónninn lítið getað gert enda hafi vinkonurnar einfaldlega verið að tala saman og hlæja á bar.

Þá datt Írisi í hug leið til að svara fyrir sig.

Hún kallaði á þjóninn og lagði fram sína eigin kvörtun.

„Heyrðu, ég ætla að fá að kvarta undan því að þær séu að kvarta undan okkur,“ segir Íris og uppskar hlátur frá Kristínu.