Umboðsmaður Alþingis hefur ákveðið að taka ekki til frekari athugunar kvörtun félags vegna ákvörðunar Fjölmiðlanefndar um umfjöllun á Vísi.is og Mbl.is.

Kvörtunin laut að ákvörðun Fjölmiðlanefndar frá 25. mars síðastliðnum um að aðhafast ekki vegna tveggja umfjallana sem birtust á miðlunum 28. janúar. Félagið taldi að umfjallanirnar brytu gegn ákvæðum fjölmiðlalaga um lýðræðislegar grundvallarreglur og vernd barna gegn skaðlegu efni.

Í kvörtun félagsins til umboðsmanns var meðal annars byggt á því að Fjölmiðlanefnd hefði ekki lagt fullnægjandi grundvöll að ákvörðun sinni og að rökstuðningur hennar hefði verið ófullnægjandi.

Umboðsmaður komst hins vegar að þeirri niðurstöðu að nefndin hefði lagt fullnægjandi mat á málið og að ákvörðun hennar hefði verið innan þess svigrúms sem henni er veitt samkvæmt lögum.

Athugasemdir félagsins við rannsókn og rökstuðning Fjölmiðlanefndar þóttu jafnframt ekki gefa nægilegt tilefni til frekari athugunar.

Umboðsmaður lauk málinu með bréfi 12. október.