Geta bækur hjálpað okkur að líða betur? Breski rithöfundurinn og bókameðferðarfræðingurinn Bijal Shah telur svo vera og ætlar að segja Íslendingum meira frá því.
Bijal heldur opinn fyrirlestur á Borgarbókasafninu Grófinni á morgun klukkan 17. Fyrirlesturinn ber yfirskriftina Lækningamáttur bóka og þar verður fjallað um hvernig lestur getur meðal annars stutt við geðrækt, samkennd, ígrundun og seiglu.
„Í sinni einföldustu mynd er bókameðferð markviss notkun bókmennta til að styðja við bata, sjálfsskilning og persónulegan þroska,“ segir Bijal.
Hún er höfundur bókarinnar Bibliotherapy: The Healing Power of Reading og stofnandi Book Therapy.
Heimsókn hennar markar jafnframt upphaf mánaðarlegra vinnustofa á Borgarbókasafninu þar sem Esther Ágústsdóttir og Elín Bergsdóttir munu vinna með gestum út frá aðferðum bókameðferðar.
