Óvenjulegt atvik kom upp í Wisconsin í Bandaríkjunum þegar dádýr braust inn í íbúð í borginni Appleton með því að stökkva í gegnum glugga. Dýrið fann síðan sömu leið út úr húsnæðinu, en þó í gegnum annan glugga.

Lögreglan í Appleton birti upptöku úr búkmyndavél lögreglumanns þar sem sjá má hluta atburðarásarinnar. Enginn íbúi var heima þegar dádýrið komst inn í íbúðina.

Lögreglumenn voru kallaðir á vettvang til að kanna málið og á upptökunni má sjá þá fyrir utan húsnæðið þegar dádýrið ákveður að yfirgefa íbúðina. Dýrið stekkur þá á glugga og brýtur sér leið í gegnum hann áður en það hleypur á brott.

Lögreglan sagði atvikið vissulega óvenjulegt en notaði jafnframt tækifærið til að minna íbúa á að dádýr væru sérstaklega mikið á ferðinni á þessum árstíma.

„Þótt það sé vissulega óvenjulegt að dádýr fari inn í íbúð er aukin umferð dádýra á þessum árstíma það ekki,“ sagði lögreglan.

Atvikið í Appleton virðist ekki hafa valdið slysum á fólki enda enginn heima þegar hinn óboðni gestur braust inn.