Guðmundur Ingi Kristinsson, þingmaður utan flokka og fyrrum ráðherra, vill leggja gjafsóknarnefnd niður og hækka tekjuviðmið vegna gjafsóknar í um 12 milljónir króna á ári en gjafsókn felur í sér að ríkið greiðir að hluta eða öllu leyti þann kostnað sem einstaklingur ber sjálfur af rekstri máls fyrir íslenskum dómstólum, þar á meðal þóknun lögmanns. Í gjafsóknarnefnd sitja þrír lögfræðingar sem ráðherra skipar til fjögurra ára í senn. Ráðherra getur aðeins veitt gjafsókn ef nefndin mælir með því.
Í umræðu um störf þingsins í gær sagði hann brýnt að fólk sem slasast geti sótt rétt sinn gagnvart tryggingafélögum.
„Ég ætla að tala um gjafsóknarnefnd sem ég tel vera einn lélegasta lagabrandara sem hefur verið samþykktur hér á Alþingi,“ sagði Guðmundur Ingi. Hann kvaðst hafa sent inn fyrirspurn um kostnað við starfsemi nefndarinnar.
Guðmundur Ingi nefndi í ræðu sinni að tekjuviðmiðið væri 430 þúsund krónur á mánuði en samkvæmt Ísland.is jafngildir almenna viðmiðið fyrir einstakling um 436.500 krónum á mánuði. Við matið er miðað við árstekjur og viðmiðið hækkar meðal annars vegna barna á framfæri umsækjanda. Hann taldi helst að finna fólk undir þeim mörkum meðal ungmenna, eldri borgara og öryrkja með lægstu tekjurnar. Eðlilegra væri að miða við meðallaun í landinu.
„Þetta segir okkur að við gætum verið með gervigreind í dómsmálaráðuneytinu sem tæki við umsóknum um gjafsókn og segði bara nei, stimplaði bara nei, nei, nei,“ sagði hann.
Guðmundur Ingi benti á að tryggingafélög hefðu bæði lögfræðinga og lækna á sínum snærum. Hann lagði til að fólk sem þyrfti að fara í mál við tryggingafélag eftir slys fengi gjafsókn og að dæmdur málskostnaður rynni í ríkissjóð ef málið ynnist.
„Leggjum niður gjafsóknarnefndina, gröfum þennan brandara,“ sagði hann.
Veistu meira? Láttu okkur vita
Það tókst ekki að sækja formið. Reyndu aftur eftir augnablik.



























Athugasemdir