Harðar orðahnippingar urðu milli Sigmundar Davíðs Gunnlaugssonar, formanns Miðflokksins, og Kristrúnar Frostadóttur forsætisráðherra í óundirbúnum fyrirspurnum á Alþingi í dag. Sigmundur gagnrýndi efnahagsstefnu ríkisstjórnarinnar harðlega og sakaði hana um að hafa aukið efnahagsvandann með skatta- og gjaldahækkunum. Kristrún hafnaði gagnrýninni og sagði ríkisstjórnina staðráðna í að koma ríkisfjármálunum í jafnvægi.
Sigmundur Davíð sagði efnahagsstjórn ríkisstjórnarinnar hafa valdið miklum vonbrigðum. Atvinnuleysi væri að aukast og verðbólga enn mikil. Hann sagði aðgerðir hennar hafa gert ástandið verra, einkum skattahækkanir og auknar álögur á almenning.
Hann ræddi einnig brotthvarf Ingvars Þóroddssonar úr Viðreisn. Sigmundur sagði Ingvar hafa varað við afleiðingum efnahagsstefnunnar en að ekki hefði verið hlustað á hann.
„Nú hefur prinsippmaðurinn hv. þm. Ingvar Þóroddsson sagt: Hingað og ekki lengra.“
Sigmundur spurði hvort ríkisstjórnin ætlaði að breyta efnahagsstefnu sinni, fjárlagafrumvarpinu og samgönguáætluninni.
„Er einhver von til þess að hv. ríkisstjórn láti af dáraskap sínum við stjórn efnahagsmála á Íslandi?“
Kristrún sagði fyrri ríkisstjórnir bera ábyrgð
Kristrún Frostadóttir hafnaði því að efnahagsvandinn stafaði fyrst og fremst af stefnu ríkisstjórnarinnar. Hún benti á að ytri aðstæður hefðu veruleg áhrif á verðbólguna, meðal annars hækkanir á olíuverði.
„Um þriðjungur verðbólgunnar í dag kemur til vegna olíuverðshækkana út af ytri áhrifum sem við höfum enga stjórn á.“
Forsætisráðherra sagði að ríkisstjórnin stefndi að því að hafa jafnvægi í ríkisfjármálum í fyrsta sinn í nærri áratug. Hún gagnrýndi fyrri ríkisstjórnir fyrir að hafa eytt meira en þær fengu í tekjur árum saman. Það hefði valdið ríkissjóði miklum vaxtakostnaði.
„Við erum að greiða 168 milljarða kr. á hverju einasta ári út af hallarekstri.“
Kristrún sagði ríkisstjórnina tilbúna að taka erfiðar ákvarðanir til að draga úr verðbólgu og vaxtakostnaði. Hún sagði að kröfur stjórnarandstöðunnar myndu auka útgjöld ríkisins. Það myndi gera fjárhag ríkisins verri.
Sigmundur óttast áhrifin á landsbyggðina
Í síðari ræðu sinni sagði Sigmundur Davíð svör forsætisráðherra ekki hafa dregið úr áhyggjum sínum. Hann taldi ríkisstjórnina ætla að halda áfram óbreyttri stefnu þrátt fyrir versnandi efnahagsaðstæður og brotthvarf þingmanns úr stjórnarliðinu.
„Það mun líklega þurfa að ganga það langt að ríkisstjórnin lendi í minni hluta til að hún nái áttum.“
Hann hafði einnig áhyggjur af því hvaða áhrif stefna ríkisstjórnarinnar hefði á landsbyggðina. Þar nefndi hann sérstaklega fyrirhugaðan Bláskógaskatt.
Sigmundur gagnrýndi að forsætisráðherra hefði oft talað um erfiðar ákvarðanir. Hann sagði það ekki réttlæta stefnu sem hann teldi ranga.
„Ég hef heyrt hæstv. forsætisráðherra tala um erfiðar ákvarðanir hérna mánuðum saman en það hefur ekkert vægi, ekkert gildi að taka erfiðar ákvarðanir ef þær ákvarðanir eru allar rangar.“
Kristrún ætlar ekki að breyta um stefnu
Kristrún svaraði gagnrýninni skýrt í síðari ræðu sinni. Hún sagði að ekki kæmi til greina að taka upp þá stefnu í efnahagsmálum sem hún taldi stjórnarandstöðuna vilja.
„Ef spurningin til mín er sú hvort hér eigi að taka upp hagspeki stjórnarandstöðunnar sem felur í sér að gera allt fyrir alla, að rýra tekjur, að auka útgjöld, að auka hallann, að auka vaxtaútgjöld, þá er svarið nei.“
Hún sagði ríkisstjórnina ætla að standa við stjórnarsáttmálann og hafna þrýstingi um aukin ríkisútgjöld og meiri hallarekstur.
„Það er í hæsta máta óábyrgt að halda áfram þeirri hallarekstrarstefnu sem var hér stunduð í áraraðir vegna þess að fólk treystir sér ekki til að klára málin.“
Forsætisráðherra ítrekaði að ríkisstjórnin yrði að hætta að reka ríkissjóð með halla, því það yki verðbólgu. Hún sagði að ekki yrði hvikað frá þeirri stefnu.
Veistu meira? Láttu okkur vita
Það tókst ekki að sækja formið. Reyndu aftur eftir augnablik.



























Athugasemdir