Björn Leví Gunnarsson, fyrrverandi þingmaður Pírata, segir heilbrigðara fyrirkomulag að hans mati væri að leggja flokkakosningar niður og láta kosningakerfið endurspegla betur að þingmenn séu kjörnir sem einstaklingar en ekki flokkar.
Björn Leví skrifar Facebook-færslu um þetta í tilefni af úrsögn Ingvars Þóroddssonar úr Viðreisn og ákvörðun hans um að ganga til liðs við Sjálfstæðisflokkinn.
Hann bendir á að samkvæmt stjórnarskránni kjósi fólk einstaklinga en ekki stjórnmálaflokka. Kosningakerfið sé hins vegar þannig úr garði gert að flestum finnist þeir í raun vera að kjósa flokka.
Því sé skiljanlegt að sumum kjósendum finnist þeir sviknir þegar þingmenn, sem þeir kusu, skipti yfir í flokk sem þeir kusu ekki.
Björn Leví nefnir sem dæmi Birgi Þórarins, sem skipti úr Miðflokknum yfir í Sjálfstæðisflokkinn skömmu eftir síðustu þingkosningar.
„Ætli versta dæmið um þetta sé ekki frá síðastu ríkisstjórn þegar Birgir Þórarins skipti úr Miðflokki yfir í Sjálfstæðisflokk örstuttu eftir kosningar. Svo stuttu eftir kosningar að það hefði líklega verið hægt að segja kjósendum það fyrir kosningar að það er það sem hann myndi gera.“
Hann bendir þó á að stjórnarskráin geri þingmönnum aðeins skylt að fylgja eigin sannfæringu.
„Það væri því, að mínu mati, heilbrigðara ef kosningakerfið endurspeglaði það og að við myndum henda flokkakosningunni á haugana,“ skrifar hann.
Björn Leví gengur raunar enn lengra í hugmyndum sínum um fyrirkomulag þingstarfa. Hann segist vilja að það verði einfaldlega dregið í lottói um hverjir sinni þingstörfum hverju sinni, í stað þess að kosið sé um það.
„Enn fremur myndi ég vilja að það væri einfaldlega lottó um hverjir ættu að sinna þingstörfum hverju sinni. Ekki kosning um hverjir gera það.“
Veistu meira? Láttu okkur vita
Það tókst ekki að sækja formið. Reyndu aftur eftir augnablik.



























Athugasemdir