María Rut Kristinsdóttir, þingmaður Viðreisnar, segir ferðakostnað torvelda íbúum landsbyggðarinnar að sækja sérfræðiþjónustu. Í umræðum um störf þingsins á Alþingi í gær kallaði hún eftir því að fleiri sérfræðingar fengjust til starfa í heimabyggð og að sjúkrastofnanir í öllum landshlutum yrðu betur nýttar.
„Skatthlutfall okkar er óháð póstnúmerum.“ María Rut benti á að allir landsmenn greiddu til sameiginlegra sjóða en búseta réði engu að síður miklu um aðgang fólks að heilbrigðisþjónustu. Íbúar landsbyggðarinnar hefðu lengi haft takmarkaðri aðgang að sérfræðingum en íbúar höfuðborgarsvæðisins.
Ferðakostnaður skipti máli hvort sem læknar færu út á land eða sjúklingar þyrftu að sækja þjónustu til höfuðborgarsvæðisins. Slíkar ferðir tækju tíma og sjúklingar gætu þurft að taka sér frí frá vinnu.
María Rut sagði að þótt sjúkratryggingar tækju þátt í ferðakostnaði í vissum tilvikum væru enn göt í kerfinu. Nefndi hún sem dæmi ferðir vegna meðgöngu og kostnað þeirra sem fylgja börnum í tannréttingar.
„Það er kappsmál að gera það að aðlaðandi kosti að flytja á landsbyggðina og sinna þessum mikilvægu störfum heima í héraði.“
Veistu meira? Láttu okkur vita
Það tókst ekki að sækja formið. Reyndu aftur eftir augnablik.



























Athugasemdir