Shukria Jorat, átta ára stúlka sem kom til Íslands frá Afganistan fyrir þremur árum, hlaut í fyrradag íslenskuverðlaun unga fólksins í bókmenntaborginni Reykjavík fyrir framúrskarandi árangur á stuttum tíma.
Sigursteinn Másson, kvikmyndagerðarmaður, segir frá verðlaununum í Facebook-færslu þar sem hann lýsir stolti sínu yfir Shukriu og fjölskyldu hennar. Shukria kom til Íslands fyrir þremur árum ásamt móður sinni, ungum móðursystrum, tíu ára móðurbróður og ömmu, frá Afganistan.
Sigursteinn segir fjölskylduna hafa verið til mikillar fyrirmyndar frá því hún kom til landsins og lagt hart að sér við að læra íslensku, stunda nám og vinna af miklum metnaði og samviskusemi.
Í umsögn um verðlaunin segir að Shukria búi yfir einstöku vaxtarhugarfari og þrautseigju og sýni frumkvæði. Hún hafi sýnt afburða framfarir í námi og sé samnemendum sínum fyrirmynd.
„Þetta er hverju orði sannara,“ skrifar Sigursteinn.
Flúði Talibana fimm ára
Shukria var aðeins fimm ára þegar henni og nánustu fjölskyldu hennar tókst með naumindum að komast undan Talibönum í Kabúl.
Sigursteinn segir að þar hafi hún átt enga möguleika á framtíð og að tilveruréttur hennar, móður hennar, móðursystra og ömmu hafi í raun verið afnuminn.
„Hún hefði engra mannréttinda fengið að njóta sem kona hvað þá sjálfstæðis,“ skrifar hann.
Þremur árum eftir komuna til Íslands hefur Shukria náð miklum árangri, ekki aðeins í íslensku og öðrum námsgreinum heldur einnig í íþróttum og tónlist.
Sigursteinn segir hana vera knattspyrnusnilling og að móðir hennar sé að kenna henni á píanó. Shukria sýni þar snilldartakta þrátt fyrir að hafa aðeins stundað tónlistarnám í nokkra mánuði.
Fjölskyldan hluti af þeirra eigin fjölskyldu
Sigursteinn segir sig og fjölskyldu sína vera afar stolt af Shukriu. Hann lýsir því jafnframt hvernig afganska fjölskyldan hafi orðið hluti af þeirra eigin fjölskyldu.
„Ég er rifandi stoltur afi og mamma er rifandi stolt langamma,“ skrifar hann og bætir við: „Þau eru fjölskylda okkar engu síður en þau sem tengjast okkur blóðböndum.“
Hann segir þau ætla að fara saman út í skóg á aðventunni til að velja jólatré og að Shukria og frænkur hennar muni skreyta það. Jólunum verði síðan eytt saman.
Í lok færslunnar tengir Sigursteinn sögu fjölskyldunnar við jólasöguna og segir að hann muni segja þeim frá flóttafólkinu Jósef og þungaðri Maríu sem fengu loks langþráð skjól.
„Síðan verðum við jólunum saman og ég segi þeim söguna af flóttafólkinu Jósef og þungaðri Maríu sem fengu loks langþráð skjól,“ skrifar Sigursteinn.
Veistu meira? Láttu okkur vita
Það tókst ekki að sækja formið. Reyndu aftur eftir augnablik.
































Athugasemdir