Fyrirtækið Pro Silver Star, móðurfélag Dallas Cowboys-klappstýranna, hefur höfðað mál gegn Emo rokkhljómsveitinni My Chemical Romance vegna búninga sem dansarar klæddust á tónleikum í Hollywood Bowl 21. október. Fyrirtækið krefst tímabundins lögbanns vegna búninga sem það segir líkjast einkennisbúningum klappstýranna.
Dansararnir komu fram í hvítum stígvélum og hvítum vestum með bláum stjörnum þegar hljómsveitin flutti lagið „Teenagers“ frá árinu 2006. Samkvæmt málsskjölum voru dansararnir einnig látnir taka þátt í sviðsettum skotbardaga þar sem þeir voru sýndir skjóta og verða fyrir skotum.
Pro Silver Star segir búningana hafa verið svo líka upprunalegu búningunum að áhorfendur hafi talið dansarana tilheyra klappstýruhópnum. Færslur á samfélagsmiðlum sýni að misskilningurinn hafi náð út fyrir tónleikastaðinn.
Fyrirtækið tekur fram að það geri engar athugasemdir við tónlist eða listrænar áherslur My Chemical Romance. Það vilji aðeins koma í veg fyrir að hljómsveitin noti einkennisbúninga klappstýranna með þessum hætti.
Fulltrúar Pro Silver Star og My Chemical Romance hafa ekki svarað fyrirspurnum E! News um málið.
